بالذكرى الـ٤٤ لتغييب الامام موسى الصدر، لاول مرة بيبرز كلمتين اساسيتين بالذكرى مش بس وحدة.
وحضر بالكلمتين ابرز المغييبين بالبلد، السيد موسى من جهة، والكهربا من جهة تانية.
هلق بإطلالة حامل الامانة، متل العادة ابدى حرصه على الحد من الفساد، وعلى وحدة لبنان والغاء الطائفية السياسية والاهم انه وجه سؤال المليون دولار عن الهيئة الناظمة واستنكار غياب الكهربا سافق صهر رئيس البلد، واكيد ما نسي يدغدغ له مشاعره للصهر المعجزة بكم نعرة حول نوع رئيس الجمهورية اللي بدهم اياه اللبنانية وإن كان بالظاهر موجهة ضد الخط السيادي الا انها بتنطبق بنفس المقاييس على الصهر المعجزة.
بدوره الزعيم الكبير كتير جبران باسيل، بعت ممثل عنه على الاحتفال بالذكرى، ولكن ما بفوته واجب ابدا خصص فيديو للحدث، هيدي الاطلالات اللي بلشت قبل الانتخابات ولا مرة بيلتزم بالدقيقة، طب غير اسم البرنامج، يعني مش حلو انك تكون كذاب حتى باسم برنامج، على اي حال صاحب الواجب ذكر اللبنانيين بمميزات موسى الصدر، يعني انا كشخص متحدر من عائلة شيعية تمجد وتثمن موسى الصدر وحركة امل، ما بحياتي سمعت هالتفاني بالحكي عن موسى الصدر، يعني هالعصف الذهني اللي كان عم يقراه كتير كتير قوي، وخصوصي هيدا التركيز الحاد على انه هو مش عم يقرا انه هيدي معلومات عامة موجودة براسه وقناعات، وعم يقنع الشيعة انهم يقتنعوا بقيم موسى الصدر وما ينسوا اهمية المسيحيين بالبلد، هلق بكرا بعد كم يوم بيطلع بذكرى بشير وبيتوجه للمسيحيين بالكلام عن حقوقهم وبيتقمص شخصية المؤمن بالسيادة والاستقلال، هلق بين الاطلالة والاطلالة بنط ع موناكو بسوح شي شوي، بس ولا مرة بينسى يذكر بالعتمة والكهربا، حقيقة عم افهم كل شي بهالزلمة بس مشاعره اتجاه الكهربا؟ يا عمي اذا بتحب الكهربا هلقد ليه هدرت المصريات لما نقول شي تاني وبدل ما تأمن الكهربا ٢٤/٢٤ وصلت سياساتك لتقطع الكهربا ٢٤/٢٤ ؟
تراشق المسؤوليات بين ٢ من اكبر الزعما الطائفيين بلبنان، هيدي لعبة اساسية بالاستحقاقات الكبيرة، الاهم من هيدا هتافات الجماهير والجحافل اللي مصدقة كل شي عم ينحكى، الاغرب انه كل هالجحافل نازلة عالمهرجان على اساس انه زعيمها هو الاقوى بينزلوا بيتفاجؤا انه ما طالع بإيده شي المعتر، بس بقدرة قادر ما حدا بشكك بقدراته.
على الهامش اكد لنا حامل الامانة انه ما حدا يراهن على الخلاف مع حزب الله وانه رايحين نقصف عمره للعدو الاسرائيلي الغاشم.. وبلشنا اصلا بوفد بيتآلف من الوزيرين dumb and dumber بعتناهم بغارة حجارة عالحدود فارتعدت فرائص العدو، اللي هاله تفاني المسؤولين اللبنانيين تاركين ٧٠٪ من الشعب اللبناني تحت خط الفقر، وكل الشعب اللبناني بلا ولا دقيقة كهربا وتحت رحمة اصحاب الموتورات اللي عم يدبحوا بظفرهم، بس المهم عند نعيم قاسم انه بطهران الدولة الايرانية عم تنصف شعبها بعز وكرامة وعم تجيب الكهربا ٢٤/٢٤ ب ٧$، والتدفئة بـ٢$.. طب معليه نسيت تقول انه هيدي كهربة الدولة بالوقت بسبب حمايتكم لفساد حلفائكم انتو تاركينا رهائن عند اصحاب الموتورات اللي محميين بكل منطقة من الزعران، طل عن البلكون على الوضع بطهران التحتا وكيف عم توصل فواتير الموتيرات بالضاحية الابية ل ٣٠٠$ واكتر، وفيك تطل على غير مناطق وتشوف الوضع كمان.
بالعودة لdumb and dumber مش منتبهين انه الشعب راجع على عصر الحمام الزاجل مع اضراب اوجيرو ورايحين عم يكبوا حجارة منيح اللي لحقوا حالهم قبل ما تنقطع الانترنت او كيف كان بدهم يفرجوا مهاراتهم؟ بس على فكرة حيروا العدو بطل عارف شو يعمل، يتمسخر علينا او يحضر حاله للحرب ضدنا؟ المصيبة اذا بلشت الحرب وما في انترنت ولا اتصالات واصلا ما في كهربا كيف بده المرشد الاعلى يتوجه للجماهير اللي رح تكون اصلا مهجرة وهربانة يعني ما في تلفزيونات، وكيف بده يعلن بداية الحرب وبعدين وقف اطلاق النار؟
وعلى فكرة المستشفيات اللي ما فيها مورفين ولا ادوية لمرضى السرطان، قال اعلن بعضهم حالة الطوارئ واستعدادهم للحرب، والاهم بلغوا الطاقم المستعد يشتغل بالحرب بانه يحضر على المستشفى بلا ما حدا يتصل فيه خوفاً من انقطاع الاتصالات، بس انا شخصيا ما فهمت من البيان اذا الاتصالات رح تكون مقطوعة بفعل الحرب او بفعل اضراب اوجيرو. بعدين طمنونا شو رح يكون وضعنا انه وزارة الصحة رح تطلع بيان توصي باستقبال الجرحى والمصابين على نفقة الوزراة او كيف يعني بس لنعرف شو ناطرنا.
قبل ما اختم ببلد ما في ولا قاضي عم يشتغل، في شخص مات تحت التعذيب من قبل جهاز امني، وهيدا شي بعتقد يصنف طبيعي بظل عهد قوي اجهزة امنية عصية على المحاسبة بقضية المرفأ وبتم تكريمها وحمايتها، واجهزة امنية بتتكافئ على تلفيق تهمة لممثل، واجهزة امنية بتشتغل غب الطلب عند اصحاب مصالح، وتهديد ووعيد لصحافي تجرأ ينقل صرخة الناس، وسلاح حاكم على مد عينك والنظر.
ان شاء الله موت اذا عم كذب بس عم صور الحلقة وما حدا بيعرف اذا رح تنشر او لا، يعني اذا قرروا عمال اوجيرو يأضربوا، وذكرى السيد موسى خلصت يعني ما في استثناءات كيف بدنا نأمن انترنت لننشرها.. خليني ساكتة
