خليني ساكتة ١٦٤ - لبنانكم غير لبناننا.. واقتحام المصارف قليل عليكم!

خليني ساكتة

تم النشر في 21 سبتمبر 2022


غمضوا عيونكم تخايلوا معي

يتحقق طلب جبران باسيل بمراعاة الحيثية المسيحية للرئيس الجديد والحيثية الوطنية. ومراعاة الحيثيات بتم بإنه ينتخب الرئيس من الشعب.

وتخايلوا انه هو ما عم يتذاكى وانه هو عم يترقي بالديموقراطية لاعلى درجة فيها بالدعوة لانتخاب الرئيس من الشعب.

الحيثية بتعني بأول دورة بيتنافسوا كل الموارنة سوا، والمسيحيين هني بينتخبوا. من بعد ما ينقوا المسيحيين اول ٢ بيطلع جبران باسيل وسمير جعجع، هون بفوت باقي الشعب عالخط لينتخب رئيسه.

ما تفتحوا عيونكم خليكم مغمضين وكملوا تخايل، الجحافل اللي بتنزل على خطابات نصرالله من مناصرين حزب العزة والكرامة بالاضافة لجحافل المحرومين المحتفلين بخطاب بري ينزلوا يصوتوا بلواحد من الاتنين.

ما تتسرعوا خليكم معي، هون شو بصير بخطاب باسيل اللي عم يهاجم بري وبأي صيغة بصير يخاطبه بس يصير بحاجة لجماهيره، لما بيلبس توب العفة ويراضي جماهير الحركة، وينزلوا يدا بيد مع جماهير الحزب ينتخبوا.

باسيل شو بصير؟؟؟

بصير عنا ببعبدا رئيس تماما تماما متل خبز الهادي اللي تسلل ع كسروان.

هلق انا بقدر مخاوف اهالي كسروان يعني معقول كمان يطعموا اولادهم خبز شيعي؟ انه صحيح في ازمة اقتصادية وكتير مرات ازمة خبز بس مش لدرجة توصل فينا نطعمي اولاد كسروان خبز مسلم.

وخصوصي هلق مع انه ماريو عون صار برات التيار، قلبي مع الصهر المعجزة بعد ما فلتوا عليه اهل بيته وخصوصي اسد جزين، واخيرا طلع واحد من اهله يشهد بمواصفاته الحقيقية.

بس قلبي عليه اكتر شو بكون عم يحس هلق باسيل هو وشايف التعبيط والتبويس بين بوصعب وهوكشتاين، وهو امله الوحيد برئاسة الجمهورية ليغطي على ضحكة بو صعب لان هيدا ما رح تفرق عنده يشحطه من التيار. وكتير معبر بس يصير يلمح انه رح يطلب مساعدة من اصدقاؤه الدوليين للوقوف بوج حكومة تصريف الاعمال ويهدد من تحت لتحت بمفاجآت لحماية موقع الرئاسة، وهو بالكاد بعده قادر يحصل على مساعدة مي خريش، بدي شوف شو رأيه باللي قاله البطريرك الراعي عن انه بس تخلص المدة لازم يضهر الرئيس كبير متل ما فات هالقصر هو قصده يحمل حاله الرئيس القوي ويفل "بلا حركات قرعة"

هالبلد واصل العفن فيه لدرجة صعبة تخيلها، الفلتان الامني والاحداث اليومية المتفرقة عم توصل انه كل راجع الواحد عالبيت لازم يصلي ركعتين انه رجع كامل متل ما ضهر ما راح بسكينة او انسرق او انفكت برقبته بشي طريقة.

لبنان الاكثر تضخما بالعالم بسعر السلة الغذائية. وهلق قبل ما يطلع حدا يتبجح ويقول بسبب الاحتلال الايراني، اي لا يصح لكم تكونوا متل ايران هني بالمرتبة السادسة.

بعدين نحن شعب كافر ما منقدر السياسات المدروسة من قبل مصرف لبنان والطبقة السياسية الحاكمة. هياه رياض سلامة وصل عالاخر ما خلا شي ما صرفه وآخر شي رفع الدعم عن البنزين من بعد ما سحب اخر نفس من جواتنا. ورفعوا الدعم عن معظم الادوية بس لسبب من الاسباب ما في ادوية بالسوق. يعني بتحس اي شي بدك تعمله بهالبلد في بالقليلة ٣٠٪؜ منه قهر.

مش انه عم تدفع لترتاح ابدا، المحل الوحيد اللي بترتاح فيه هو الحكيم النفساني لمن استطاع اليه سبيلا بالايام.

ومش من المفيد تاخد دوا اعصاب لان بين سعره وبين انك تلاقيه بتكون استنفدت اخر فيوز من اعصابك.

وبلشت المدارس. النكتة الكبيرة هو مدير عام وزارة التربية ووزير التربية اللي انزل تهديد بالمدارس اللي بدهم يطلبوا دولار، طب يعني البنزين واللبنة والخبز والميكانيسيان والبوتوكس بالدولار بس وقفت على مدرسة الاولاد؟ انه هالمعلمة اللي بدها تتحمل هيدا الطفل اللي اهله ما قادرين يحملوه بالبيت ل ٨ ساعات بس عمرها ما تعيش هي واولادها؟ هلق اكيد صاحب المدرسة مش ضميره صاحي ورح يغدق هالمعلمات بس في حد ادنى من المنطق. بعدين شو بده يعمل الوزير يعمل ضبط للمدرسة ويحولها عالقضاء؟ تماما متل رئيس البلدية اللي اذا عمل محضر بصاحب موتور بده يحوله ع وزارة الاقتصاد اللي موظفينها مأضربين اتحولوا على القضاء اللي مأضرب لان بده زيادة معاشات وجزء منها بالدولار؟

باختصار كل موظفين الدولة مأضربين، وكل رؤوس السلطة ما فارق معهم، مفلتين النصاب الكبير عالنصاب الاصغر منه، اذا حدا يسلم عليك ما تنسى تعد اصابيعك من وراه.

على الهامش في شيخ بصيدا اعترض على واحدة لابسة مزلط، هيدا الشيخ ما شاف في حرام بشي عم بصير بالبلد الا انه في امرأة سافرة، اما تجويع العالم والنهب والنصب فحلال. وكمان فرقة مياس اللي ذكرتنا انه فينا نكون بشر طبيعيين واهتماماتنا تكون عادية وننبسط برقصة دغدغت المشاعر الدينية اسلاميا ومسيحيا قال ما بصير نمجد الحية، على اساس الثعابين اللي حاكمين بأمرنا حلال تمشوا وراهم وتهللولهم.

قبل ما اختم القاضي العظيم المحسوب على العهد القوي الوزير هنري خوري وافق على تعيين قاضي رديف بقضية المرفأ، كله هيدا نزولا عند رغبة جي يس بالافراج عن بدري ضاهر، وتمسيه التحقيق لدرجة طمسه بما يتناسب ومطالب المرشد الاعلى المحلي. الوقاحة ما وقفت عند القاضي الرديف، اللي اصلا ما عم يلاقوا حدا لهلق يلعب الدور معهم،

وقاحته وصلت ليتهم اهالي الضحايا يإنهم عملا سفارات.. رجع قال انا ما قلت مدفع لهم انا قلت دفعوهم يجوا ع بيتي وللامانة اذا واحد بيقدر يوقف بوجهكم يا قليلين الضمير ويقبعكم واحد واحد مش كتير يتعامل مع الشيطان.. لان ما الهيئة في امل الواحد يتخلص منكم الا بشي سحر متل الفودو

ان شاء الله موت اذا عم كذب بس كله بعده مقبول قدام مجموعات من الشعب بعدها ماشية ورا زعما لو في شعب حقيقي لكان سحلهم بالشوارع بس للاسف كما تكونوا يولى عليكم... خليني ساكتة