الله لا يعجق حدا متل ما منبقى معجوقين بهالبلد
بقولوا بكل عرس النا قرص الا نحن بلبنان بكل مأتم النا تابوت.
بهالبلد صرنا المثال الحي على تعددت الاسباب والموت واحد، أما أسباب موتنا وموت أهلنا كيف ما برمناه رح يطلع بطريقة من الطرق للسلطة فيه إيد.
تقريبا نسينا الموت الطبيعي بهالبلد، نحن شعب او بموت حريق او غريق او تشنشط عالطريق..
عادة بأي كارثة طبيعية او مأساوية بأي بلد بالعالم تستخدم عبارة الحق عالدولة، بس نحن ما عنا دولة نحط الحق عليها، فمنصير نقول الحق عالسلطة الحاكمة، الحق عالزعماء، عالحق عالفاسدين.
المشهد السياسي العام للبلد بأفضل الحالات راوح مكانك، وكل كم يوم رجعة لورا.
يعني فينا نغيب اسبوع، اسبوعين يمكن شهر او شهرين ورح نرجع على نفس العناوين تحلحل في تشكيل الحكومة، عقدة بالملف الرئاسي، الملف الحكومي إلى تعقيد، الملف الرئاسي إلى تأجيل.
الدول الغربية تتمنى، الدول العربية تتأمل.
ووضعنا حقيقة يدعو إلى التأمل، تأملوا معي مشهد الانفلات الامني وصولا إلى النحر بالشوارع.
شو بدي خبركم؟ بعد عنا اقل من ٤٠ يوم لانتهاء العهد القوي، هلق للأمانة بتعرفوا انتو يمكن لإن العهد هلقد قوى نحن نحطينا تحت هيك اختبار ل ٦ سنين، انه طبيعي بس تكون قوي تتحمل، يعني بلكي بكرا بالمستقبل بعد ما يستلم الفراغ ويجي بده يسلم بعد حين بلكي الرئيس اللي بده يجي مين ما كان يكون يعطي العهد اسم مايلد او ضعيف، يمكن القدر يشفق علينا ويصير يكب لنا تحديات على قدنا.
الحرب بالسوشيل ميديا مشتدة، وواضح انه العونيين نازلين بقوتهم على الشبكة، فيديوهات دعم للرئيس وتحضيرات لنهاية العهد، واكيد اكيد قاطف اللحظة منور الشاشات رافع الراية الصهر المعجزة ظهر علينا بالحلقة ١٠٠ بعد الالف من مسلسل ما خلونا. على فكرة صار كتير كتير سخيف المسلسل يعني قبل كنا نضحك عليك، هلق ما بقى لابق لك، يا زلمة شبت وبعدك بما خلونا، غير الموجة شوي، مد خط من عند لمبة لبنان زميلتك ومستشارتك السابقة ندى البستاني عندها تنوقع بالمواقف، اسم الله عليها نازلة عم تهتف بدها العدل، هيدا العدل تبع الافراج عن الموقوفين بقضية المرفأ، بس ضحايا المرفأ عادي، لإنهم مش موقوفين بنظارة هول للندافع عنهم، هول وقفت حياتهم وحياة اهلهم بسبب اهمال وفساد اشخاص انتو حاطينها بمواقع المسؤولية، وحاميينها، وكمان وقفت حياتهمم بس من كان يعلم وما عمل شي.
بيبقى انه في كارما بالحياة، ممكن يطلع بدري ضاهر بريء من الاهمال بجريمة المرفأ، بس ما بظن سنين السجن رح تروح ضيعان، بكرا بس يصير في بلد حقيقي ويتحقق بالفساد اللي كان ناخر المرفأ نخر يمكن يطلع بعد النا عنده.
على الهامش المفتي دريان عم يحاول يخفف من ثقل الاحباط السني وجمع النواب والقيادات، بس للأسف جثامين اهالي طرابلس وعكار اللي عم يلفظها البحر غطت على المشهد، طلع احباط شعب عم يكب اولاده بالبحر لينقذهم اكبر بكتير من احباط طايفة عم تحاول تحافظ على محلها بالسياسة، يمكن كان بيسوى المفتي يكون دريان بالكارثة ويأجل اللقاء او على الاقل ينقل مكان انعقاده على طرابلس.
وعبقت دار الفتوى بالوجوه، هلق للحقيقة اليوم كل سني مشروع رئيس حكومة، تماما متل ما انه كل ماروني مشروع رئيس جمهورية.. وحده وحده متل زهر البيلسان رئيس مجلس النواب عم يقهقه بداخله، مش قليل على فكرة انك تكون زعيم شيعي، هيك في امان وظيفي ابدي.
الصبايا بايران
قبل ما اختم صحيح صدر بيان فرنسي سعودي اميركي بشدد على اتفاق الطائف والقرارات الدولية، بس الواقع عالارض بيثبت انه البيانات الدولية تقريبا عم تصدر رفع عتب، وكإن لبنان حالياً مش على أي أجندة عربية او دولية أو بالقليلة مش من أولوياتها. هيدا ما بيعني اننا لازم نتفاءل وننبسط بالتسويات الداخلية اللي ممكن تجيب رئيس جمهورية، مش لان انا ضد السيادة والاستقلال ورئيس صُنع بلبنان بس تذكروا انه آول وآخر مرة إجا رئيس صُنع في لبنان طلع لنا ميشال عون.
ان شاء الله موت اذا عم كذب قرب تعويم الحكومة، وقرب ترسيم الحدود، وقرب انتهاء العهد، بس يا ريت اي شي من هيدا بيعني انه قرب موعد خلاصنا من الاصعب. هيدا مش نق وسلبية هيدا بس تذكير بإنه المشكلة بش يوزير طلع او نزل، او رئيس تغير اسمه او صهره، المشكلة بنظام سياسي بعده مستمر بالمحصاصة وحماية حاله من دون اي خطة علمية للنهوض بالبلد.. وكله هيدا ترقيع لتقطيع الوقت ليدفع صندوق النقد الدولي وصندوق النقد الدولي بده اصلاحات والاصلاحات بدها دولة والدولة... خليني ساكتة
