خليني ساكتة ١٦٦ - التطبيل لترسيم الحدود البحرية.. والتزمير لانتخاب رئيس جديد!

بالحياة في سياسة، وفي ولدنة، وفي ولدنة بالسياسة

وفي دبلوماسية، وفي هبل، وفي هبل بالدبلوماسية

وفي انتصار، وفي وهم، وفي انتصار وهمي، هيدا بالذات في شعرة رفيعة بينه وبين الانتصار الإلهي

بتذكر اول ما بلشت حياتي بالصحافة المكتوبة، كنت اكتب عن كل شي ما افهم تفاصيله، واحكي اخصائيين لإفهم الـ paterns تبع العالم، ومثلاً عرفت انه العالم بيلجؤا للبصارين وعلم الغيب لمّا بكونوا فاقدين شي او شخص بشكل نهائي وبحاجة لأي امل يرد لهم هالشخص أو الشي اللي فقدوه.. هيدا هو تحديداً واقعنا مع الانتصارات، وقد ما صرنا متعلقين بالانتصارات تyلصت انتصاراتنا من تحرير فلسطين وترسيم الحدود البحرية وحقل قانا لـ deriere دوروثي شيا.

بعرف انه الأرجح ما خصه بس ما قدرت الا اتخايل عيون جبران باسيل عم يضووا بس شاف هيدي الصورة وقال هيدي اللي لازم تتوزع عالاعلام من القصر الجمهوري، ما حسيت انه ورا توزيع الصورة الا واحد بيطلع منه عبارة "اما شو كارولين".. بس مش مهم الدبلوماسية ولا الاحترام ولا الاخلاق ولا حتى مهم نشوف الامور متل ما هي انه شخص عم يعمل شغله وعم يمد ايديه لشخص كبير بالعمر ليساعده ياخد الاوراق، لاااا كان لا بد من اضفاء عنصر الانتصار الالهي على المشهد، وطاف جهابذة الممانعة بوصف المشهد على انه جبل بعبدا ركع الاميركان والاسرائيلية سوا وبلش جمهوره يوعدنا ٢٠٤٧ رح نتذكر قيمة ما انجز جبل بعبدا، اللي وأخيرا فات بشهره الاخير.

بعد اقل من شهر المنطق بقول بصير عنا رئيس جديد، بس لإن كل شي بهالبلد بعيد متل هون والمنطق، رايحين بكامل انهيارنا على الفراغ بس بسعر صرف رسمي بـ ١٥ الف بدل ١٥٠٠.

اي ما تفكروا انه ما تحقق ولا انجاز يستحق الذكر الاسبوع الماضي، ابدا تحقق وكتر، اقرينا موازنة، وقربنا نشكل حكومة، وجربنا ننتخب رئيس والاهم من ترسيم الحدود صورنا شيا عم تسلم الاوراق لجبل بعبدا.

طلع لنا نشوف مسرح النواب مرتين بالاسبوع اتنين وخميس، برنامج فكاهي عم يعبي غياب المسرح الوطني تبع اخوت شناي وشوشو. مين بيلطش التاني أسرع ومين بقهقه على نكتة النبيه ومين بيضحك؟ ومين بيزعل من النبيه ومين بيحرد؟

اللي صار بجلسة انتخاب الرئيس عرض اذا بروح على american got talent بنافس فرقة ميّاس، الممانعين بمدرب واحد قائد الاوركسترا الأوحد لوحة فنية بـ ٦٣ ورقة بيضة، ايقاع واحد صوت واحد تطيير نصاب واحد، بقالبه معارضة، معارضتين، ٣ معارضات.. واكيد كل مجموعة طلعت الافهم بنظر جمهورها والاكثر ائتماناً على الجمهورية.

نواب التغيير مرة جديدة تمايزوا عن الباقيين لدرجة راح لقوا الماروني الوحيد اللي ما بده يترشح على الرئاسة ورشحوه، بس نقوه لأنه قِيَمِيّ، مستقلين انتو رئيس قِيَمِيّ ما حدا بيعرفوه يصير رئيس جمهوريتنا؟ بس شو المانع اكيد رح يبقى افضل وانسب من شو عنا.. هلق اذا هي لعبة استراتيجية ذكية لما يكشفوا الاسم اللي كانوا ناويين يروحوا يعملوا الجولة التانية فيه على القيادات ليروجوا له، مش كان مثلا أفضل يحطوا بالصندوق اسم ميلاد بو ملهب انه بالقليلة وجه مألوف بالساحات من جهة ومن جهة ثانية اكيد اكيد افضل من جبل بعبدا يعني عنصر التفوق على الحالي مُراعى.

بس خطفوا التغييرين الاضواء والقوات عاتبوهم عتب شديد اللهجة، هلق بصرف النظر انه انتخاب سليم اده عمل مضحك بالسياسة بس القوات ليه منتظرين انه التغييرين يسمعوا كلمتهم؟ بس الأهم من كل هيدا يمكن صار لازم التغييرين يعملوا شي لنفهم عليهم لان صحيح هني مش مسؤلين عن الخراب اللي وصل له البلد بس كمان ما لازم يتحولوا ليصيروا من جماعة الهم أني بلغت وما طالع بإيدنا شي، وين هالاسم اللي بدنا نرشحه؟ انه هلق نحن عّم منناور ك ١٣ يعني؟ هاي المناورة مش مضيعة للوقت ومساهمة بالوصول للفراغ؟ ليه ما بطرحوا للاسم وببلش الشغل على الترويج اله ولبنرنامجه او كمان ناويين ترشحوا واحد تاني تقنعوه وج الضو هالمرة بانه يترشح مش قبل بليلة

الهامش كتلة وليد بيك اللي مسلم زمام الأمور لتيمور صوتت لميشال معوّض، بالدورة الاولى، هون ضربة المعلم، ابرة بالعضل للمعارضة، بروح مفعولها مع اول استحقاق "رئيس توافقي لصالح البلد" وبيقلب عالمقلب الاخر، واكيد فلول تيار المستقبل بيرجعوا بلفوا على رأي سعد اللي بكرا بالرغم من اعتزاله السياسي بيطلع بيدعم التصويت للرئيس تماماً متل ما حط كل تقله وكتب تغريدتان دعم لمياس.

قبل ما اختم فرنسا بعتت طلب مساعدة قضائية ، بموضوع اختلاس وتبييض أموال، إثراء غير مشروع، تزوير واستعمال المزور، تهرب ضريبي... بحق كبير اللصوص رياض سلامة وخيو ومساعدته ماريان الحويك.. قولكم بيعرف القضاء الفرنسي انه القضاء اللبناني مأضرب؟ وشو بصير هلق مثلا بيطلب رياض سلامة كف ايد Stéphane Thibault مدعي عام باريس، مقعول توصل ليطالب لبنان بتعيين قاضي فرنسي رديف بقصة ملاحقة رياض سلامة؟

على فكرة لازم بتعويم الحكومة نرجع علي حسن خليل وغازي زعيتر وكمان يوسف فينيانوس، وبيقدر كل وزير يعمل متل الوزير التونسي هيدا اللي احال نفسه عالتحقيق قدام وزارته وطلع براءة. هيدا أفضل حل عنا بلبنان من ميلة منشيل حمل عن القضاء ومن ميلة تاني منريحهم نفسيا للشباب.. انتو مستقلين ندى البستاني عّم تحقق مع ندى البستاني او مثلا نهاد المشنوق عّم يقل له لنهاد المشنوق بس يسألوا عن تاريخ نيترات الأمونيوم بالمرفأ انت عارف حالك مع مين عّم تحكي؟!

ان شاء الله موت اذا عم كذب بس انا كنت خايفة ينتخبوا ميلاد بؤ ملهب رئيس للجمهورية نقوم نوصل لصفر كهربا، والزبالة تملي طرقاتنا، والادوية تنفقد من السوق وشركات الاحتكار تسحب دمنا، ويروح حق ضحايا ٤ أب، ويتسيس القضاء ويتعطل، والمحسوبيات تاخد محل الكفاءة، ويصير عنا شي ٤ اسعار لسعر صرف الدولار والاهم من كل هيدا نروح ع جهنم... خليني ساكتة