خليني ساكتة ١٦٧ - بآخر أيام العهد الكوليرا يضرب في الداخل.. والعدو محتار وين الكهربا ليضربها!

العدو الاسرائيلي الغاشم بلش الاستخراج التجريبي من حقل كاريش

بس نحن مسكنا العدو من رقبتوه لانه بحاجة للغاز

صحيح هلق اللي قالوا الحج محمد رعد ما بينطلق حرفيا مع اللي قالوا المرشد الاعلى المحلي بإنه خروجنا من الانهيار والمستنقع اللي حاطتها فيه هو وحلفاؤه ومحوره ما بصير الا باستخراج الغاز، بس هني بحزب العزة والكرامة هيك في بيناتهم تمايز عادة اوعى تفكروا انهم مثلا عندهم اجندة ايرانية عم ينفذوها؟

انه بعد ناقص تقولوا انهم عطيوا الضو الاخضر للتوقيع مع اسرائيل لحد ما ايران تاخد مكاسب من الاميركان بعملية تبادل مساجين والافراج عن ٧ مليار دولار

بعد ناقص مثلا تطلبوا تعملولهم فحص دم ولائي انه هني مش عملاء للخارج، ما هو الخارج معروف اتجاه واحد مسار واحد عميل السفارات يعني عميل لاميركا لاسرائيل لاوروبا بس ما صفة العملاء ما بتنطبق عايران، وروسيا هول دول المحور.

انتو مستقلين محور بيلعن ١٣ انتصار بالساعة، برسم حدود، ليستخرج نفط، بيكسر حصار، بيستورد بواخر.. بس عالتلفزيونات ويواكبه جمهوره المنتصر عالسوشيل ميديا؟

والانتصار مراحل يعني منعلن الانتصار ومن بعدها منعتمد على ذاكرة السمكة الذهبية اللي بيتمتع فيها الشعب اللبناني لا من يحاسب ولا من يحاسبون.

اعلام العدو اللي انتو بتستشهدوا فيه يوميا بس بتلاقوا اشخاص من عندهم على قياسكم وقياس ابواقكم، ونحن ما فينا نستشهد بكلامهم لان بتلبسونا تهمة عمالة داير عم يخبر شعبه قديشكم نصابين بلبنان وبسميكم واحد واحدالملفت بتحس فيه تنسيق اعلامي بينكم وبين العدو، يعني بتستعملها نفس المفردات انتو وهو ونفس اسلوب الانتقاد لاتفاق ترسيم الحدود ونفس المماطلة والممايعة واخر شي بتطلعوا دافنينه سوا.

اكتر شي مضحك هي مرحلة التهديدات للامانة هيدي نحن حقيقة منتصرين ومتفوقين فيها، لان هيدا العدو اللي بلش استخراج نفط ومأمن ملاجئ لشعبه وبيعتبر اذا واحد نقز من صوت باب طبش جريح، قد ما فوكس عالداخل بعده بهددنا بالعتمة الشاملة، ناوي يقصف الكهربا ما انتبه العدو التافه انه فيه حدا اتفه منه قصف عمرها للكهربا منذ سنوات هو وتياره.. هلق حدا ينط يقول هيدا مش انجاز للعهد وتيار الافقار والتعتير حدا يشكك بكلام المرشد المحلي ما شايفينه للعدو واقف على اجر ونص محتار بده خريطة موتورات الاشتراك وعم يدرس كيفية استهداف الواح الطاقة الشمسية.

على الهامش الامن العام حذر من رشوة عناصر الامن العام للحصول على باسبور.. تحذير الراشي اساسي لان المرتشي ما بكون قصدوا ياخد الرشوى لانه بكون عم يساعد.. وبعدين ما عم افهم شو هال tendance عند الشعب للتحايل عالقانون، بلد حاجزكم بلا باسبورات كرمال مصلحتكم الشخصية، منتبهين عالحرب باوكرانيا، شايفين الغلا باميركا، مارق عليكم طوابير البنزين بفرنسا؟ شو بدكم بالباسبور بتروحوا تدفعوا رشوى ؟ لوين بدكم تسافروا؟ وين رح تلاقوا متل تراب الوطن ؟ اصلا ممكن يرجع جزء كبير من المغتربين يقضوا الشتوية معنا، لانهم يا حرام مفكرين انه البلد عنا ارخص مع الغلا اللي ضارب اوروبا والعالم. وهو حقيقة ارخص اطلع بقيمتك كانسان بلبنان وقارنها بقيمة الانسان بأي بلد بالعالم وخبرني وين فيه انسان رخيص هلقد وانا بعدين احكي.

قبل ما اختم في نوع من العالم بتحس انه منحوس

اي شي بيجي بدي يعمله بعقد بمحل معين وبيبقى مربوط

قد ما حاول يشد فيه لقدام او بيبقى محله او بيرجع لورا ويدهوره

اي بتحس لبنان من هيدا النوع.. اللي اي شي بده يصير فيه بيجي فيه عقدة بالنص، تشكيل الحكومة معطل وانتخابات الرئيس مأجلة، لان كل قرطة بالمجلس عندها ٤٣ نائب بالقليلة وبالتالي التعطيل مضمون، هيدا الاسبوع التعطيل برعاية العونيين لان قال بري ما انتبه انه ذكرى ١٣ تشرين عند العونية ودعا لجلسة فأخد ع خاطره الصهر المعجزة عدم الاعتراف بنضالاتهم كتيار الارجح ما يحضروا ولان حزب العزة والكرامة منتصر لكل حركات التحرر ومقاومة الظلم الارجح يدعمهم وما يحضر او يحضر وما يفوت عالجلسة.. هلق بصرف النظر مين رح يحضر ومين لا ومين رح يكون المسؤول عن تطيير الجلسة بيبقى الاساس انه انتو عارفين انه ما في جلسة ونحن عارفين انه انتو عارفين وانتو عارفين انه نحن عارفين انه ما في جلسة.

ان شاء الله موت اذا عم كذب بس باقي حوالي ٢٠ يوم على العهد القوي، بعهد الانهيار الكبير المطعم بحكومات المحاصصات والمحصن بحلفاء العزة والكرامة، سجل لبنان اصابات بالكوليرا، مرض فتحنا كتاب التاريخ وطلعناه، اصابات بالكوليرا بسنة ٢٠٢٢ ببلد مرق عليه فترة يعرف فيه بمستشفى الشرق الاوسط.. الكوليرا بيجي نتيجة للتلوث والجية ونقص المياه والمي الملوثة بالمجاري والاكل الفاسد .. والاهم من هيك مرض متل هيدا ما بيرجع ببين على سطح بلد الا اذا كان البلد مصاب بطبقة حاكمة فاسدة معفنة متلكم.. خليني ساكتة