اسبوع تاريخي تخلله اتفاق تاريخي مع دولة ما منعترف فيها وسعر تاريخي للدولار واتصال تاريخي من بايدن كأول رئيس موجود على الخارطة الدولية بجبل بعبدا بـ٦ سنين وانشراح تاريخي لشيا بترسيم الحدود على شوي بتحسها أم العروس تلاها خطاب تاريخي من المرشد الاعلى المحلي بعد سنين من ضرب الناطور تحولنا للاستمتاع بأكل العنب ما شجع جبل بعبدا على التغريد من دون خوف معلن الانتصار التاريخي وتلاه خطاب تاريخي من الصهر المعجزة اللي اكد انه معه مكملين، هلق بدول العالم الطبيعية بس يفل الرئيس بتفل ادارته معه ويأفل نجم اصهرته واولاده وعائلته بس عنا ما منعرف لإن نحن حتى ما منتصنف دولة.
بموضوع الترسيم مبروك علينا ترقيتنا لبلد نفطي، بحسب التلفزيون الليموني، وحقنا كشعب نفرح ونحتفل بالغاز اللي بالبحر هو ذاته هيدا متل شراية السمك بالمي، بس ليه بدنا نكون متشائمين، اي رح يطلع لنا غاز وبأفضل تقديرات عندها شي ٥ مليار دولار على ٢٠ سنة، هول اكيد بدنا بالقليلة ٧ سنين ونص لنبلش نقول بثقة انهم موجودين بالوقت اللي الاسرائيلي بعد التوقيع بده ٧ دقايق ونص ليفتح الحنفية ويبلش يستخرج. كمان مش مهم المهم انه بدنا بالقليلة ١٠ سنين لنطلع اللي صرفهم كبير اللصوص رياض سلامة بآخر ٤ اشهر، يعني نحن ما رح نكون زعلانين نغرق بأموال النفظ والغاز بس الواحد بده يحكي ضميره قبل ما يبيع الخبرية للعالم، بلد بس ديونه أكتر من ٩٠ مليار دولار، جبران باسيل لحاله بلع ٤٦ مليار دولار بالكهربا، غير اموال الدعم وسرقة تعب العالم. قال هيدي الطبقة السياسية رح تغصب ٣ مليار.. او رح تتعظ وتترفع عن الدنايا ورح يجوا واحد ورا واحد يقولوا لا لا نحن شبعنا من اللي سرقناه قبل ما ممكن نمد ايدنا خلوا هال ٣ مليار للشعب يحرم عليه واحد منهم يطلب حصته منهم او ياكل مال غاز هو وعيلته اعتبروهم بلا ضمير بالمرة، بعدين ما المرشد الاعلى المحلي حاطط الغازات بعهدة مجلس النواب المؤتمن على محاسبة الحكومات المتعاقبة ومن المعروف اصلا بهيدا المجلس انه السارق والمجرم والفاسد لا مكان له.
مش قليل من بعد هالعمر نوصل لمرحلة التزقيف واكل العنب، نحن شعب ما ببين معنا حتى الحليف الاول لحزب العزة والكرامة ما عم يرحمه واتهمه بإنه متساهل مع صعاليك الفساد، على فكرة مش من عدم استعمل جبران باسيل تعبير صعاليك الفساد استخدمه عن خبرة عن دراية عن كيف بدي قل لكم بحسوه استخدم التعبير عن وصف ذاتي.
الملفت بباسيل انه هو وعم يحكي بتحس الحكي اللي طالع منه اكبر منه، يعني متل لما بتشوف هيك شي طفل وبتقول اسم الله عليه من وين جايب هالحكي اكبر من عمره، بيطلع هيدا الولد عم بقلد بيه مثلا، اي بس باسيل صايرة هويته ضايعة شوي بين مثله الاعلى بجنون العظمة عمه وبين مثله الاعلى بإدارة الكرة الارضية المرشد الاعلى المحلي. هيك بيطلع بيشرح لنا شو منيح النا وشو مش منيح شو مضر بصحتنا، بنظر بالكهربا المفقودة بجهوده بالمي المقطوعة بفضله بالسدود القاحلة بهمته، وبيشرح وبفسر وبيعلك بالحكي لإننا نحن شعب قاصر يعني اذا ما شربونا اياها بالملعقة مرتين بالاسبوع ما ممكن نفهم وين مصلحتنا.
المهم طلعت هالمرة مصلحتنا بتتقاطع مع مصلحة العدو الصهيوني الغاشم وخلصنا من هالقضية، وقطف جبل بعبدا الانجاز التاريخي قبيل الخروج من القصر واشرأب المارد العوني عالسوشيل ميديا بتحس انه طلع من كبوته نحن كنا مفكرين انه السنة عندهم احباط سني لا على ما يبدو الاحباط العوني كان اكبر.
وقد ما ضخ الاتفاق ادرنالين بجبل بعبدا ما حمله راسه طلع فقعنا تغريدة بانه هيدا الاسبوع رسمنا الحدود البحرية والاسبوع الجاية رح نرحل النازحين السوريين، نسي تفصيل زغير انه يخبرنا كم نازح رح نرحل اذا وافقت السلطات السورية تاخدهم، لان بسؤال بسيط جدا للاجهزة المختصة بالعملية طلع اننا بعتنا ١٦٠٠ اسم للسلطات السورية اللي على ابعد تقدير بتوافق انها تستقبل نصهم، بس لنكون متفائلين ونعتبر انها استقبلتهم كلهم رح نكون اعدنا الى سورية ١٦٠٠ نازح كاملين من اصل مليونين و٨٠ الف، وهيدا كله بظل مخاوف كبيرة للمنظمات الدولية على سلامة العائدين ولكن ما همنا المهم ان يكتب جبل بعبدا انتصار جديد باسمه قبل ٣١ تشرين الاول.
على الهامش النواب والتكتلات ملبكين عزمتهم السفيرة السويسرية عالعشا وما عارفين ليه معزومين قبلوا القوات رجعوا اعتذروا قال ما كانوا عارفين انه في نوايا تقريب وجهات نظر وتمهيد لعرض مؤتمر حوار، بده يشوف جبل بعبدا شو بده يعمل بهيدا الموضوع لان ما بيقدر يفقد هالقد بسرعة التراند والمينشتات لصالح خبرية جديدة بالبلد. ويبدو هالعشا عامل عمايلة واول من أصيب منه هو تكتل التغييرين زعل وضاح الصادق المتمسك بالطائف اللي ما ممكن يحل محله اي مؤتمر دولي، ودويهي قال انه ابراهيم منيمنة رح يمثل نفسه اذا راح.. بس السؤال الاهم انه seriously هلق؟ بلد متل سويسرا عن جد منتبه اننا على الخريطة، ليكونوا بعد هالعمر جايين قال حرام هول بالزمانات كان لقبهم على اسمنا هيك لنساعدهم كرمال ال legacy تبع اسم سويسرا الشرق مش اكتر.. هلق بعد السفيرة السويسرية ما قالت شو تحديدا موضوع العشا ممكن يكون مثلا brainstroming كيف ممكن يقدروا يستجوبوا رياض سلامة... يعني مش دفاعا عن سويسرا بس للامانة ما شكلها الها جلد تفوت هيك فوتة معكم.
قبل ما اختم قال وزير الاقتصاد متفائل قال في تقدم مع صندوق النقد الدولي.. هو ناقص هيدي السلطة المفوخرة تعويم بقروض وعروض.. بس الاهم انه رئيس المجلس الدستوري مقرر يطلع نتائج الطعون الانتخابية يوم الخميس اذا ما انقطعت الكهربا.. طب هلق مثلا انا تبع خليني ساكتة اذا كنت بدي اعمل مجهود وعضف ذهني لاتهاضم بشي طريقة ساخرة على موضوع بجدية اعلان نتائج الطعون الانتخابية وقلت لكم بدكم ما تنقطع الكهربا شو كنتو قلتوا عني؟ بس
ان شاء الله موت اذا عم كذب بس وصلت ذكرى ١٧ تشرين، والساحات فاضية، اجت ذكرى ١٧ تشرين التالتة والشعب مخدر مكتوم الصوت غارق بخنوعه وذله وتبعيته.. اجت ذكرى ١٧ تشرين يوم اللي كان في حلم غط وطار.. خليني ساكتة
