خليني ساكتة ١٦٨ - أسبوع ترسيم مجيد.. وتكتل التغيير عم ينزل بنزول الدولار

900 مشاهدة تمّ عرضه للمرّة الأولى قبل 16 ساعة

واخيرا صح انه ٦ سنين ما شفنا الخير من هالعهد

الا انه باخر اسبوعين انفلجت عالاخر، ترسيم حدود مع العدو ومع الشقيق، تصدرنا ويب سايت منظمة الصحة الدولية بالكوليرا، انقطاع الكهربا ل ٣ ايام متتالية عن المطار و٥ ايام عن المرفأ، بس ما حدا حس لان عنا موتورات، اول شتوة غرقت السواحل، للصراحة ما غرقت شي بس طلعت الطبقة السياسية من تحت الارض .. هيك اصلا نحن كل شي منعمله لازم يكون على مستوى العهد القوي، الشتا القوي، الظلام القوي والسيادة القوية.

عنا كم يوم يوم شغل هالاسبوع، هو العبرة بالخواتيم، وهيك جاية الاسبوع الاخير من العهد مشعشع انجازات، هوكستاين راجع الخميس لتسجيل يوم التوقيع المجيد بالتاريخ، بس ما بعرف يمكن بعد كل هالعمر لازم بالقليلة نقدم اعتذار ولو متأخر لجماعة اتفاق ١٧ ايار بما انه هيدا الاتفاق كان عاطي حقوق شوي اكتر للبنان بالحدود البحرية. على كل حال شو بدنا بالماضي، خلينا بالانتصار المجيد المقبل، اللي رح يخبي الفراغ الرئاسي وغياب حكومة فاعلة.

كان وصل تعويم الحكومة للتم، رجع غير رأيه جبران باسيل، تذكر حقوق المسيحيين، وقال هو مش طميع بس خايف على مصلحة البلد، وطلع عناا راسين ميقاتي من ميلة وباسيل من ميلة منيح اللي في فرق بالطول او كان تكسير الرووس طرطش على المجموعة.

المرشح الدائم السابق لرئاسة الجمهورية رياض سلامة، ويمكن الحالي مين بيعرف ليه هالطبقة الحاكمة الها رب، صاير يعرف يخطف الاضواء منه سهل والله هيدي على عشرة المشاهير يمكن، هيك وعي يوم الاحد شي الساعة ٦ ونص بالليل واصدر بيان، نفس متل اللي دايما بيصدر منهم هول البيانات تبع من فسّر الماء بالماء، انه قال ما بقى رح يشتري دولار عالمنصة بس رح يبيع، كإن كان في عالم عم تترك سعر السوق السودا ب ٤٠ الف وتروح ع منصة تبيع دولاراتها.. يا عمي والله الكذب عادة بكون عالميتين مش عالعايشين، بس معكم حق ما اغلبية هيدا الشعب صارت ميتة، والملفت انه بس بالدولار كل مرة بفوت الشعب باللعبة وبياكل نفس الضرب. لعبة جديدة من كبير اللصوص جمع الدولارات ليسحب الكتلة النقدية اللي باللبناني اللي وصلت لحوال ٧٣ تريليون بالسوق، بس لان كل هيدي الخزعبلات ما فيها ولا شي علمي يعني الوضع راجع على محله، والثابت الوحيد هدر وحرق أموال واحتياطي ولهوة للعالم اللي عايشين بدوامة المصايب،، ونزل الدولار ٥ الاف بس شو بدنا نعمل التجار شاريين بضاعتنا عال ٤٠ الف من هيك مضطرين يبيعونا عل ال ٤٢ الف.. الثابت الوحيد بيترتفع الدولار بترتفع الاسعار بينزل الدولار بترتفع الاسعار لانه التجار خايفين انه يرجع يطلع من جديد.

على الهامش من بعد المرشد الاعلى المحلي طلع البطريرك الماروني وكمان ذكر بإنه المجلس النيابي هو المؤتمن على البلد، وحذر من المسرحيات تبع انتخاب رئيس الجمهورية، صرنا هلق مقطين ٣ جلسات والخير لقدام، وعلى فكرة منيح في نواب التغيير هالسنة بالمجلس، تخايلوا لولا هال ١٣ او ١٢ او يمكن يكونوا صاروا أقل آخر هالحلقة شو كان صار؟ شو؟ اللي كان صار انه كنا بقينة رهينة نفس النكت والوجوه تبع ايام محاولات انتخاب جبل بعبدا من ٦ سنين، أي وجود هالنواب الشباب اللي متل قلب النهار، هالوجوه اللي ما عارفة شو بدها تعمل بحالها يوم تكتل ويوم انفصال ويوم اجتماع ويوم لقاء تشاوري ويوم camping

عن شو كنا بدنا نحكي بشي جديد حقيقة، حتى ملك الاوف الاوف اوف ما كان رح يلاقي شي جديد يضوي عليه.

بعدين كل جلسة انتخاب بيطلعوا التغييرين باسم جديد مرة اسم تجريدي مرة اسم تعبيري يعني ليلي ما عم يفهم عليهم للنواب لان الفن بالسياسة مش للكل يعني فن السياسة اله ناسه. بس الحكيم عم يحاول تكتيكيا واستراتيجيا يستميلهم، لنشوف اذا بتزبط معه. الا اذا رجع قرر يوعى خيه بآخر المطاف.

هلق البطريرك الراعي بصلاة الاحد قال التعطيل خيانة عظمة بس أئمة المساجد بصلاة الجمعة دعوا لربنا يهدي السياسيين ويجيبوا رئيس توافقي، وفي منهم شطحوا بخطب بالأسابيع والعزوات بالقرى لانهم يحطوا الحق على السفارات وهون اكيد السفارات مين يعني؟ ايه السفارة السعودية والاميركية، هني هو المجم،عة اللي بتخطب بالسبوعات ما بتوصلها نشرات من أي السفارات اخرى متل ايران مثلا، باطل ولا سوريا بالسابق، بعدين في شي اساسي هيدي السفارات بالذات مش بحاجة اصلا تصدر بيانات لأزلامها عالارض يعملوا هي شو بدها ما بتتذكروا المرشد الاعلى المحلي لما خبرنا انه بيكفي انه هو يكون بيعرف انه في موضوع ما بيزعج خاطر المرشد الاعلى الاصيل حتى هو من عنده يتصرف ويشيل الموضوع من التتداول.

المهم وبلا ما نزيدها كتير الطائف كلهم حريصين عليه، تماما متل ما كلهم حريصين على محاربة الطائفية والوحدة الوطنية، ومكافحة الفساد وجلاء الحقيقة بانفجار المرفأ.

قبل ما اختم اكتشفنا شي اضافي هالاسبوع ما كنا منتبهين له انه جبل بعبدا عند مستشار للشؤون الروسية، هيدا المستشار كتير قوي بحول مصاري بصرف مصاري بيقدر ياخد محل البنوك وبياخد وبجيب رسائل خارجية ومؤخرا تحول من روسيا لسوريا لترسيم الحدود، هيك بتحسه عم يحاول يكون نسخة مارونية مرة عن القرض الحسن ومرة من اللواء عباس ابراهيم او الحج وفيق صفا بس طالعة النسخة شوي A la Ali express

ان شاء الله موت اذا عم كذب بس ما معقول ناكل عنب مع العدو ونبقى عم نقتل الناطور مع الشقيقة، فبلشنا ترسيم حدود شمالية، بس حدود بحرية ما حدا هلق يفوتنا مزارع شبعا ما مزارع شبعا.. اي كل خطوة بخطوتها.. بس نبقى نرسم الحدود البرية مع الدولة اللي ما منعترف فيها مناخد ومنعطي بموضوع مزارع شبعا من هلق لوقتها... خليني ساكتة