ترامب صار رسمياً عنده صهر لبناني الاصل، على فكرة سعر الاصهرة غلي من يوم اللي العالم تعرف على جبران باسيل، الصهر اللبناني الاول اللي انه في اسرار صحف واخبار انه في دولة عربية (قصدهم قطر) عم تدفع تكاليف المحامين بأميركا ليشيلوا العقوبات عنه ليجي رئيس. بس على كل حال نحن بدنا "رئيس بيحمي ظهر المقاومة" هيدا هلق الشعار الجديد والشرط الوحيد بالرئيس، بس للامانة هيدا مش شرطنا نحن هيدا شرط المرشد الاعلى المحلي وحزبه، بس انه حتى ما نبين مغلوب على امرنا.
شعار بسيط واضح بريء، مش بكرا تطلعوا تقولوا انه الجماعة عم يعطلوا البلد ليجيبوا الرئيس اللي بدهم اياه. هلق ما بعد الشعار وما بعد بعد الشعار هيدا مسؤولية اللي بدهم يطعنوا المقاومة بالضهر، يعني من الاخر كل واحد بيحكي بسلاح بايد الدولة، كل واحد بيحكي برئيس يوم بتسموه سيادي ويوم استقلالي ويوم معارض هيدا الحكي ما بينصرف هون لانه حكي مطعم بالعاملة للخارج.
هلق قال في اجتماع بين كتل ومجموعات المعارضة بالمجلس ما عدا القوات والاشتراكي لينظروا بالمرحلة المقبلة وكيف بدهم يكملوا المشوار. والتيار قال الورقة البيضا هيدي مد ايد للجميع يعني متل حمامة السلام مش للتعطيل ولا لشي. اما ميشال معوض بتحس اللي مرشحينه كمان بنفس الوقت مش مرشحينه، لدرجة ع شوي هو رح يبطل عارف حاله اذا مرشح عن جد او لا؟ وبيبقى الاساس عند الكل انتخاب رئيس ما بعرف يمكن بيي هو اللي معطل الانتخابات.
على الهامش انا بحب اشكر حسن نصرالله لانه اعاد بالويك اند النبض لشارع ١٧ تشرين السوشيل ميدياوي بالقليلة، ولولا شيرين رجعت لحسام حبيب وسرقت التراند يمكن رجعنا نزلنا على الشارع شكرا لان يعني كيف بدي قل لك ذكرت الجماهير ليه حقيقة نزلوا عالشارع من بعد الاحباطات المتتالية اللي عم تلاحقنا متل اللعنة، واخرها التشرذم بصفوف ال ١٣ نائب اللي اجو من خارج الاصطفافات وما قدروا يتوحدوا، وبقي بعضهم يتجنب مواجهتك ويحور ويدور حول المشكلة الحقيقية، طلعت انت بكل تعجرفك تحكي عن العمالة، كانت النتيجة انه العالم رجعت تذكرت نضالاتها بالساحات هيدي النضالات الحقيقية اللي ما بتشبه الانتصارات الوهمية اللي بتبيعونا اياها بالكيلو.
جماهير ١٧ تشرين بحاجة لهزة، واصبعك واتهاماتك الجاهزة اللي بتحب طلعها غب الطلب، حركتها بدك رئيس ما بيطعن بضهر المقاومة بس حلال يطعن بضهر الشعب، بدك رئيس متل العماد عون الرائد الاول لعهد الانهيار العظيم، بدك اياه متل العماد لحود السباح الاول لعهد الاغتيالات.
الغلاء مش فوضى، العالم عم تموت ع ابواب المستشفيات مش فوضى، انعدام الامان الاقتصادي والاجتماعي والسياسي مش فوضى، بس ١٧ تشرين فوضى.
انفجار بيروت مش فوضى، احداث الطيونة مش فوضى، ترويع المتظاهرين مش فوضى بس ١٧ تشرين فوضى.
القعدة عالطاولة مع الفرنسيين ليطلعكم من المغطس اللي وقعتوا فيه والحد من وطأة ١٧ تشرين على النظام والسلطة مش تنسيق مع السفارات، تهريب الفاخوري، مش تعامل مع الاميركان وعمالة للخارج، ترسيم الحدود البحرية ومنح اسرائيل اكتر من ١٤٠٠ كلم على طبق من فضة وشو ممكن يكون فيهم من خيرات مش تطبيع مع اسرائيل، تجيب مصرياتك وسلاحك واوامرك من ايران مش عمالة بس ثورة المواطنين العزل اللي عم يطالبوا بحقهم ضد مرتزقة السلطة والطوائف والفاسدين والمجرمين وأزلام الخارج كل الخارج .. عملاء الهيئة مرشدك الاعلى بلش يتوتر من تحركات الشارع الايراني؟ طولت اكتر مما كنتوا مفكرين؟ هيدي هي التحركات اللي كنتوا خايفين منها وبلشتوا تروجوا انه الاميركان عم يحاربوا الدين ويزرعوا المثلية بالمجتمعات لانكم كنتوا بلشتوا تلمسوا انه اللي رح يفجر الشارع الايراني هالمرة اكبر من الوضع المعيشي، واجت مهسا اميني عذبت نفسها حتى الموت لتولع الشارع الايراني.
وهلق طالع بحملة استباقية جديدة، شكرا انك طلعت متذكر مين ١٧ تشرين، اكتر من كتير من ال ١٧ تشرينيين، على كل حال طلعتك اعطني انا شخصيا امل، امل كنت بلشت افقده انه العالم تعودت وسكتت وخنعت، بس طلعتك دليل على الخوف من تحرك الشارع، وانه يكون هيدا الحراك قريب وقريب كتير. وهالمرة اذا فلتت الامور كيف بدكم تقدروا تقمعوه شو بده يتحرك هالشعب فواتير موتيرات؟ حق تنكة البنزين؟ فاتورة الكهربا الجديدة؟ الدولار الجمركي؟ الفواتير على سعر المنصة؟ شو بده يحركه الا ارتهان للدول العظمى اللي بدها تنال من هيبة الدولة المقاومة. حتى الجيش اللبناني مشتبه فيه ليك عيد الاستقلال بعد شي اسبوع انا رأيي هيك وهيك ما في رئيس بهمتك ورئيس الحكومة كمالة عدد ورئيس المجلس نصك التاني.. قوم نزل جيشك يعمل هو العرض العسكري.. قوم خلصنا بقى انت حامي الحمى وانت الشريف الاول والاخير وانت ربنا الاعلى، ما في لزوم تضل تذكرنا انه لو البلد بإيدك كنت جبت الكهربا، دايما في فعل مجهول ونائب فاعل بحديثك وحديث فريقك، قوم خود البلد وجيب الكهربا، يعني لو ما ملف الكهربا بالذات ما كان بإيد حليفك الاول من اكتر من ١٥ سنة وهادر في اكتر من ٤٦ مليار دولار بقول الواحد.
لما جبت المازوت الايراني مين قدر يوقف بوجهك؟ قوم جيب الكهربا.
التحقيقات بيمشوا بأمرك والملفات بينكشفوا بأمرك والتهريب بصير بأمرك، الرئيس ما بيجي الا ع خاطرك، الحكومة ما بتشكل الا برضاك بس انت مش ماسك البلد... اي عفوا الحج محمد رعد قال جربتوا تشكلوا حكومة وما قدرتوا، يعني شو هالمعضلة وهرتكم على معارضينكم اقوى من هي على حلفائكم.
حامي حلفائك الفاسدين، وحامي النظام الموبوء، بسلاحك بس مش ماسك البلد.
الاميركان طاعون ووباء للمنطقة، والنظام بلبنان والمنظومة واللي حاميهم شو؟ كوليرا؟ وسرطان؟
٥ جلسات او مسرحيات لانتخاب رئيس الجمهورية والسادسة عالطريق اللي انت بترضى عليه او لا احد.
ان شاء الله موت اذا عم كذب بس خطابك ولو طلع منك بس هو دليل على مأزق هيدا النظام اللي متل الاخطبوط باذرع متعددة من الفساد والاجرام وراس واحد.. خليني ساكتة
