خليني ساكتة ١٧٣ - استقلال رهينة احتلال الهي.. وجبران باسيل قدوة للحربوق علي طليس!

الجيش اللبناني بحب يخبركم انه الوطن مسؤولية

اي هيدا هو شعار الاستقلال رقم ٧٩، يعني السنة الجاية متل هلق بصر لنا ٨٠ سنة مستقلين

بس اذا بقينا ماشيين متل ما نحن هلق لنصير مستقلين عن خارطة الكرة الارضية

لان للأمانة بأداء هيك منظومة اذا بدنا نكون صادقين مع نفسنا لازم هال ١٠٤٥٢ كلم مربع ينعطوا لحدا يقدر قيمتهم

لشعب يعرف شو قيمة الارض لمسؤولين يعرفوا شو قيمة الشعب لحكام يعرفوا شو قيمة الوطن

الوطن مسؤولية، يعني اللي بيقعد ٣٥ بسدة الحكم وما بيطلع من أمره شي وما بيتحمل مسؤوليته بفل

الوطن مسؤولية يعني اللي بيستلم وزارة الطاقة لأكتر من ١٥ سنة وما بجيب الكهربا بفل

الوطن مسؤولية يعني اللي بيهدر دم الشعب وبيتهمه بالعمالة بفل

الوطن مسؤولية يعني اللي بيسرق مال الشعب وبينهب خيرات البلد بفل

الوطن مسؤولية يعني اللي بيقتل العالم بحرب اهلية لـ ١٥ سنة بالجملة وبعده عم يقتلها بالمفرق بفل

الوطن مسؤولية يعني لازم يكون في مقومات بلد، لازم يكون في اقتصاد، في إدارات عامة، في تعليم رسمي، في مستشفيات حكومية، في طرقات في طبابة.. في بلد

لكل واحد حاسس حاله مخنوق ومعصب ومأزمة معه

لكل واحد حاسس بضيق الافق، ما عم بفهم شو جاية بعدين

تذكر انه الوطن مسؤولية

بلد اخد استقلال سنة ١٩٤٣

يعني بعد ٢١ سنة بصر النا ١٠٠ سنة مستقلين

شو بدكم بالحكي حلو التاريخ، ومش اي تاريخ التاريخ البعيد لان للأسف كل تفاصيل حياتنا اليومية بتثبت اننا ماشيين بخطى

واصل الاستقلال للركب بالبلد، بس ناطرين رأي ماكرون للاستئناس، ورأي الاميركيين لتبادل وجهات النظر، بس هيدا كله ما بيطلع شي قدام رأي الايرانيين، مش لإنه لا سمح الله نحن رهائن عند حزب العزة والكرامة والمرشد الاعلى المحلي بيفرض علينا اللي بناسب مرشده الاعلى لا أبداً، لان نحن منحب الاراء المحبوكة متل السجاد، مدروسة قطبة قطبة، رئيس يحمي ظهر المقاومة، خارجية بتراعي الامتداد الاقليمي وما بتنكر الجميل، والاهم من هيدا بلد سيد حر مستقل رهن الاشارة.

نحن بلد سيد حر مستقل عن منطق السياسة، منطق الاقتصاد ومنطق المؤسسات.

مستقل بكل مفاصله، قضاءه مستقل الا عن الحج وفيق، والصهر المعجزة، والاستيذ نبيه عند الحاجة

سياسته الخارجية مستقلة الا عن خاطر المرشد الاعلى المحلي ومن لف لفه

مؤسساته العسكرية مستقلة الا عن الزعيم او الطائفة اللي بتتبع لها

مستقلين باستقلال كبير اللصوص رياض سلامة بالخيارات الاقتصادية؟ هيدا مش استقلال هيدا تفرد

قد ما حملوا مسؤولية الوطن جوعوا شعبه، هجروا اولاده ودمروا اقتصاده

من كتر ما حملوا مسؤولية الوطن افلسوه وقضيوا عليه

بعيدا عن الاستقلال الكل تمسخر على علي طليس وانه هو مش مخترع ولا مبدع ولاشي بس هيك شي مدعى على فناص حربوق باللبناني، بس للأمانة انا حسيته عنده مثل أعلى لاحقه، عنده قدوة يعني صاير داخل كل لبناني حربوق جبران باسيل صغير. وين الغلط؟ شو الفرق؟ يعني هلق بعرف ما في على يتزوج بنت الرئيس الماروني ويعمل جبران باسيل، بس اذا علي نقشت معه وتزوج بنت من بنات الرئيس برى وصار صهر الكرسي التانية ونحن ما انتبهنا لكيف بلش بس لقيناه قدامنا صهر بكامل انجازاته.. الدنيا حظوظ انه هيدا المعتر عمل حاله مبدع بزمن السوشيل ميديا فانكشف

على الهامش جبران، عم يوعدنا انه هو جاية رئيس وانه رح يرفع عن نفسه العقوبات لان مش فاسد وانه هيدا كله لانه هو حليف مع حزب العزة والكرامة عم يتعاقب من الاميركيين. شفته انه الوطن مسؤولية، باسيل والمرشد الأعلى بتتبادلوا المسؤوليات، انت بتحمي لي فسادي ومركزي وانا بحمي لك سلاحك.. معتبر حاله عبقر زمانه انه القصة كلها وانه اذكى واحد بالبلد.. وما شايف انه قراراته وقرارات عمه وصلتنا على الانهيار التام، واحكمت قبضة السلاح على رقابنا.

وهلق عم يلعب لعبة التمايز قال التقى بري "البلطجي" بالمخفي وبلغ حليفه الحزب باللقاء، وبعدين نحن قد ما بلد سيد حر مستقل في مطلوب عالتحقيق بتفجير العصر مش بس نائب لا وكمان لاعب اساسي بموضوع انتخاب رئيس الجمهورية بيطلع علي حسن خليل بخبرنا انه مرشح الثنائي اصلا مش فرنجية حاليا ما يعلم علينا باسيل هني مرشحهم الورقة البيضا حمامة السلام مد اليد للآخر اللي بده يتفاهم.. بس خلص ما بقى محرزة هالسنة اصلا نحس من أولها بلشت برئيس العهد القوي.. فرح نفوت على ٢٠٢٣ بأقوى فراغ بالجمهورية بلكي بكون وجها احلى علينا.. على امل ما نكون بذكرى الاستقلال لـ ٨٠ السنة الجاية نكون بعدنا عم نحكي بالفراغ ونفتش على رئيس جمهورية لان القادة المسؤولين ما عرفوا ينتخبوا رئيس

بس نحن شعب ما بموت ونحن طائر الفينيق اللي بينبعث من تحت الرماد بس مش يعني نخبي الرماد تحت السجادة ونعتبر حالنا عايشين.

قبل ما اختم بتحس في تنافس غير معلن بين المسؤولات العونيات، شعلة الذكا رندلى جبور، هيدي على فكرة اكثر اتقاضاً من لمبة لبنان ندى البستاني، اعتبرت انه بدري ضاهر مظلوم اكتر من وليام نون، بدي قل لك شي واحد ممكن كتير يكون بدري ضاهر مظلوم بقضية التفجير بس صدقيني لو في قضاء حقيقي وبلد يفتح ملفات ويحاسب بالفساد رح يطلع القضاء اله عنده والايام اللي قعدهم لهلق بالسجن ما راحوا ضيعان.. الوقاحة واصلة فيكم لتصيروا بلا نخوة، بتقدروا تدافعوا عن بدري ضاهر حقكم وحرين بس عن جد انه مظلوم اكتر من وليام نون؟ عن جد؟

ان شاء الله موت اذا عم كذب بالشياح قلعة الصمود، hub الثنائي الشيعي ولا سيما حركة امل، القوا القبض على حرامي موستيكلات (اي مش موتويات) لا موستيكلات هول تبع دعم غارات خندق الغميق على متظاهرين ١٧ تشرين وهيك، اي في حرامي بالشياح تجرأ وعم يسرق موستيكلات، لقطوه اولاد الشياح وطعموه اللي فيه النصيب، صوروه فيديو وعملوا له اللي فيه النصيب وآخر شي علّقوا لافتة على صدره مكتوب عليها، "أنا حرامي دراجات نارية في الشياح"، وربطوه بعامود عليه صورة كبيرة لنبيه بري... خليني ساكتة