غوووووووول
آه ما شفتوه؟ ما حضرتوه؟ آه ما عم ينقلوا المونديال عالتلفزيونات؟ ايه والانترنت مش منيحة لتحضروا الماتش؟ ليه وين عايشين؟ بأي بلد؟ مع طرزان بالغابة؟
لا نحن بلبنان، وين عالخريطة؟ شو بكم بطلتوا تعرفوا لبنان هلق؟ هيدا البلد اللي اخترع الحرف، وطلع من شواطئه اللون الارجواني.. بلد فيروز والرحابنة واول مدرسة بالشرق الاوسط..
نحن هيدا البلد اللي عنده مدينة رياضية الاولى بالعالم العربي من ١٩٥٧، يعني تحديدا قبل ١٤ سنة مما تخلق قطر.
اي نعم، الحكي موجه لجماهير الاحزاب اللبنانية اللي حاكمة من الـ٧٥ يعني ٤ سنين بعد استقلال قطر والاعتراف فيها على خريطة العالم..
بحسبة بسيطة جداً زعمائكم وما حدا غير زعمائكم انتو، هول اللي تقاتلوا بالحرب على حساب اهلنا وحسابنا، واللي بعدكم مناصرينهم بالسلم، وانتخبتوهم من كم شهر.. بحوالي ٤٧ سنة حولوكم لبلد حتى ما فيكم تحضروا فيه مباريات كاس العالم عالتلفزيون ببيوتكم.
من كم سنة كانوا مرة بيشحدوا المونديال ليحضرونا اياه، مرة بشرعوا سرقة الدش ليحضرونا اياه، ومرة بيدفعوا حقوق البث، وبفوتروا الموسم دوبل سعره نص ل بي إن ونص للجيبة، اي ما هو المونديال بيجي كل ٤ سنين يعني لازم الواحد يكون ذكي بالاستثمار هيدي صفقة بتجي مرة بالعمر، ووزير الاعلام اللي بيجي المونديال على وقته بده يلحق حاله.
هول الزعماء اللي رجعتوا انتخبتوهم وشرعتوهم دولياً، عاملين فريقين بالبرلمان فريق ممانع وفريق سيادي وعم يتحدوا بعض وعم يناوروا وكل مباراة بتخلص بينهم بالتعادل السلبي او الايجابي ما بهم، المهم انه لو واحد سجل قبل التاني بيبقى التعادل سيد الموقف بالاخر لان ممنوع الخروج من الملعب وفي غالب ومغلوب، حتى الحرب الاهلية خلصوها بلا غالب ولا مغلوب بالطائف، وصولا لـ ٧ ايار كمان خلص لا غالب ولا مغلوب بس بقطر.
اي قطر الاخت الصغيرة اللي المدينة الرياضية تبع لبنان اكبر منها بالعمر، من بعد ما صالحت اللبنانيين ب ٢٠٠٨ لحقوا زعمائها يعملوا منها لاعب سياسي بالمنطقة، مستقطب لرؤوس الاموال، وصولاً لاستضافة كاس العالم. أما نحن وين؟ نحن اصلا مش فاضيين لهيك انجازات مكلفة انه قال حطوا ٢٢٠ مليار دولار على ملاعب فوتبول ليجيبوا كاس العالم لعندهم.
ما تفكروا نحن بهالسنين ما حققنا شي وتحسوا بالضعف قدام الاشقاء العرب انه قطر عندها مونديال، والمنتخب السعودي ربح عالارجنتين، ومنتخب المغرب على بلجيكا.. اكيد غير التحليق الصاروخي والتغييرات بهيدي البلدان، معليه نحن بهالسنين تصدرنا نشرات الاخبار العالمية بأطول مزبلة بالعالم، بأكثر تلوث لنهر، بواحد من أكبر الانفجارات غير النووية بالعالم.. هلق بيتخللها اكبر جاط تبولة، اكبر جاط حمص، مرات اطول سلسلة بشرية واسرع دبكة...
وحتى ما تختلط علينا الامور، وتتسرعوا وتبلشوا فيي، سجلنا بحقوق الانسان مش كتير ناصع.
بس نحن انجازاتنا ما بتكلف مصاري، نحن اصلا بلد غير مادي، وما منعرف اصلا نتعامل مع المصاري مش بعيننا، شوفوا مثلا صرفنا ٤٦مليار دولار عالكهربا لنقطعها بشكل تام، هيدا الانجاز مش اي دولة بالعالم بتقدر تعمله.
هني شايفين حالهم بملاعبهم طب نحن عنا نحن عنا سدود ما بتعبي مي. هني شايفين حالهم منتخباتهم نحن شايفين حالنا بجبران باسيل، هلق بشرفكم ما كل واحد لما شافوا بالملعب هو وابنه عم يحضروا الغايم حس براحة نفسية، شكر ربه انه جبران وابنه تمتعوا عنا كلنا نحن الشعب الرتش.
بس في ارقى من حكامنا؟ غير انهم يعني بلا احساس وانه المهم هني عم يحضروا المونديال، بس شفته نجيب ميقاتي شو مزوق هو وعم يهني السعوديين على انجازهم بالربح عالارجنتين، وعم يثمن دور قيادتهم الحكيمة بإيصالهم لمصافي العالمية.. هيك بتكون القيادات الحكيمة معك حق على فكرة، بس سؤال القيادات اللي ما بتعمل شي لشعبها ولا حتى بأمن له يحضر المونديال دخلك كيف لازم شعبها يشكرها؟ في بعض الاصوات صارت تقول انه قديه رح يطلعوا من ثروتك اذا بتدفع من جيبتك وبتنقل المونديال؟ قديه كان الرئيس ميقاتي، مسؤول وقيادة رشيدة وحكيمة لما قال اذا بده يدفع ٥ مليون دولار في اولويات، معقول انتو تقبلوا ينحط ٥ مليون دولار عالمونديال وطرابلس مدينة رئيس الحكومة من افقر مدن ساحل المتوسط؟
وفي اصوات قالت لو كل واحد مد ايده على جيبته وحط شوي كان مشي الحال، يعني مش عم نقل لكم ردوا الاموال المنهوبة، ولا عم نقل لكم اعطونا مصرياتنا العلقانة بالمصارف، بس انه من مصرياتنا اللي نهبتوهم على مدى هالعمر، دفعوا وانقلوا المونديال.. جدي بس كنا نزركه بالنقاش انه الزعماء حرامية.. كان دايما يدافع عن الرئيس بري الله يطول بعمره وعن الرئيس الشهيد الله يرحمه ويقول انتو ما بتعرفوا شي بالقليلة أكلوا وطعموا... بس هالايام صعبة حتى بالكرم في انهيار.
وعلى فكرة بتقدروا كزعماء تبيعوا خبراتكم بإدارة صروح الدولة وخاصة الملاعب مثلا، انه هلق بعد ما يخلص المونديال حتى ما تحس حالها قطر انه صار عندها ملاعب تاريخية ما الها نفع.. علموها كيف بتحول الملاعب لمخزن طحين تحت المدرجات، وما تنسوا انه تعلموها انه مش اي طحين تحط هونيك الطحين المدعوم واللي جاية هبة من دول عالم تانية للشعب ما يجوع.. وما تنسوا لازم يكون في رطوبة لضمان العفن.
وكمان خبروها انه مثلا بيقدروا يدربوا بالملاعب كلاب القوى الامنية، او حتى يحولوها ثكنات جيش.. وفيهم كمان مثلا يستخدموا هيدي الملاعب قواعد عسكرية لجيوش اجنبية على أرضهم.
على حال حال كل ٤ سنين منوقع تحت خيارات هل منحضر شحادة من قطر؟ او تكرّم من القطريين؟ او سرقة من القطريين... خليني ساكتة
