٣١٢ بند ع جدول الاعمال لا ٦٥ طب منخلصها ب ٢٥ موسم اعياد منعمل ديسكاونت، طب ليه ما بتعملوا جلسة حكومة مع كل ٣ بنود بيطلعنا واحد ببلاش؟
قال في وزراء مقاطعين حفاظا على الدستور، على اساس هو باقي شي من الدستور، تعطيل انتخاب رئيس الجمهورية لعيون الصهر المعجزة مش منافي للدستور، تعطيل تشكل الحكومة كرمال عيون الصهر المعجزة مش منافي للدستور، دعم وجود السلاح غير الشرعي بصلب الدستور اللبناني، هدر المال العام من كنف الدستور، هو اصلا اذا بيلبق لحدا يكون امين عالدستور وحارس الشرعية ما في الا تيار الافقار والتعتير بتلبق له هالمهمة.
هلق النكتة مش بس بحجة الحفاظ عالدستور، ومخاوف ووندر وومن التيار على حقوق المسيحيين المحبوكة قطبة قطبة متل السجاد الايراني، النكتة بإنه بحسب الست مي خريش انه الوضع اللي عم تتحجج فيه الحكومة الصحي والاقتصادي غير مستجد نحن اللي منعرف انه مش مستجد ما هو عهدكم ما ترك شي مصيبة ما عودنا عليها والاهم حقن الستيرويد اللي بيعطوها لكل قضية بالبلد ليحسسونا انه في شي عم بصير.
يعني هلق اذا ميقاتي عقد الجلسة او ما عقدها ب ٣١٢ بند او ببندين تحديدا تحديدا شو رح يتغير، يعني حتى مضي للمستشفيات او ما مضي، دفع للاتصالات او ما دفع، كل الهم هال ٣٥ مليون دولار اللي بدنا نصرفهم ب ٣ اشهر على ادوية السرطان وغسيل الكلى.. واللي رح يلاقوا طريقة يدفعم مصرف لبنان اجتمعوا او ما اجتمعوا.. فبدل ما تقعدوا تنحطوا ما بدكم الحكومة تجتمع بالقليلة عملوا شي لحتى مثلا بس تندفع حقها وتوصل الادوية ما تنضب بالمخازن وتنباع بالسوق السودا والعالم عم تموت.
اجتماع حكومة ميقاتي بصفة تصريف الاعمال، شو بيفرق عن اجتماعات حكومته وجكومات غيره الاصيلة؟ ما هو كله بصب بالمحل نفسه تركيب طرابيش من دون ولا خطة مدروسة ولا حتى رؤية ولا كمان اي منطق. بس هو ميقاتي كمان لعيب اعطى باس ع شوي لمسيحيي الشرق كافة يعطوا رأيهم بالاجتماع، وصار المسيحي اللي ما بيدلي بدلوه بيعتبر مفرط بحقوق المسيحيين، ما يفتح الباب على بازار التصريحات وخصوصي للمهتمين والمرشحين لرئاسة الجمهورية. لدرجة حتى الرئيس السابق ميشال عون (خي حلو لفظ السابق) بصفته مسيحي وماروني طلع بيان استنكار لخطوة ميقاتي وقال انه اللي عم يعمله ميقاتي بالبلد غير مسبوق، على اساس انه ترك شي سابقة بحق البلد ما ارتكبها جبل بعبدا، بس ملفت نشاطه بالهويكاند بتحسه اشتغل قد ما اشتغل بال ٦ سنين الماضية.
الوزراء المقاطعين ال ٩ المستقلين بحكومة المستقلين هني حريصين على المواطن بس كمان ملتزمين بعدم التعرّض لثوابت التوازن الوطني، انتو مستقيل شو ممكن يصير اذا اختل التوازن الوطني؟ انا بعرف بلد اختل فيه التوازن الوطني قامت انقطعت فيه الكهربا، وفي وطن تعرضوا لثوابته ابناؤه ما لقيوا دوا، وفي وزراء ما احترموا دستور بلد قام فريقهم السياسي بدل ما يطالب بحق ضحايا انفجار محي نص المدينة، عم يخزق تيابه وما عارف كيف بده يطلع بدري ضاهر من السجن.
على سيرة بدري ضاهر، رجع ورد اسمه بالحلقة ٨ من مسلسل انتخاب رئيس الجمهورية، ما بعرف ليه بس عندي شعور انه لمبة لبنان ندى البستاني هي اللي آخدة على عاتقها تصوت باسمه، لإنه ببين على ضحكتها هيك انها خرج المواقف والمهات الصعبة، والياس بو صعب كريستوفر كولوبوس الحدود البحرية عم يتمايز، للمرة التانية بصوت لزياد بارود، قال لحد ما يذكر انه الخيار التالت بالبلد ممكن.. زيح التكتيك تبع القوات اللبنانية بعده مكمل بترشيح ميشال معوض اللي تراجع سكوروا هيدا الاسبوع بهمة قوى المعارضة اللي ما عارفة حالها شو بدها لحد هلق.. وبلش يظهر زيح الاستراتيجية بتلميحات من جورج عقيص على مناقبية واهمية قائد الجيش اللي محافظ على وحدة المؤسسة العسكرية.. بس مفاجأة حلقة الانتخابات كانت الورقة البيضا المخزوفة، هون متل الفن ما في فن تعبيري وتشكيلي وتجريدي اي هيدي الورقة البيضا المخزوقة بتندرج ضمن الفن التعبيري يعني على عيار انا خانقتها بس هي شحطتني من البيت.
على الهامش قال نعيم قاسم دعا للتوافق لان ما حدا قادر يأمن ٦٥ نايب، التوافق عن حزب العزة والكرامة مفهوم ما بده كتير تفسير، هني بحطوا الاسم والطرف التاني بيتوافق.. اي معادلة خارج هالمعادلة تندرج تحت خط اللعب في ذيل الوحدة الوطنية والاقتراب من نار العمالة للخارج والتطبيع. واللي ما بيعرف خطورة التطبيع من الضرورة العودة لتصريح نائب حركة الافواج هاني قبيسي اللي ذكر بإنه العقوبات الاميركية هدفها تركيع هيدا الوطن الاحر الابي لحد ما يوقع مع اسرائيل ويطبع (هون عم نحكي عن اليابسة، ما في البحر يبقى في البحر ما في لزوم نقلب أمواج على بعض).. للأمانة اذا بده يحكي الواحد ضميره انا بشك انه لو سلمتوا المهمة لإسرائيل كانت عملت بالشعب اللي انتو علمتوه فينا.. عم بصير في التباس بهوية العدو الحقيقي لهالبلد.
قبل ما اختم قال رئيس الجامعة اللبنانية وقع بروتوكول تعاون مع جامعة المصطفى العالمية، هيدي يعني على نسق هارفرد او اهم الارجه، لانها على لائحة العقوبات الاميركية من ال ٢٠٢٠، الارجع الشيطان الابعد قرر يحطها على لائحة العقوبات لانها عم تنافس جامعاته ما قدر يحد من انطلاقتها الا بهيدي الطريقة.. ونحن كجامعة لبنانية عريقة المستوى بالسنوات الاخيرة بحاجة لهيك توأمة من باب رد الجميل والوقوف الى جانب الدول الداعمة النا ما العلم سلاح.. ما نحن اللبنانيين اللي اخترعنا الحرف اصلا ومن بعدها كمان اخترعنا شي ٢٧ الف شهادة غير موجودة (لما نقول مزورة) ووزعناها على اشقائنا العراقيين..
ان شاء الله موت اذا عم كذب بس انا وعم درس ابنتي درس التربية قال من مسؤولياتي اتجاه وطني من بعد الحشو والشعر والنثر قال لازم أخلص في العمل لأكون مواطناً منتجاً.. طب هالطبقة السياسية بإمها وبيها ما في ولا مرة وقفت قدام المرايا وسألت حلها شو المنتج للي قدمته لهالوطن؟ طب ما حدا حس حاله مقصر بحقنا مثلا لمرة واحدة فقط؟ خليني ساكتة
