خليني ساكتة ١٧٧ - المونديال على أرض الاشرفية.. وستيفاني صليبا بالتحقيق بدل كبير اللصوص!

بتفوت ع المسرح تحضر امسية شعرية غنائية لطلال حيدر وغادة غانم..

بتعيش ساعة بعالم خاص بوطن بتحلم فيه.. بلبنان بدك اياه.. بلبناننا.. بتضهر بتلاقي حالك بحرب سوشيل ميدياوية عن كيف بتفوت على الاشرفية وكيف بتضهر منها..

وكيف جنود الرب عم يحمي قلعة الصمود.. وكيف ما حدا يجربنا.. واللي قاعد على حياد عم يخفف من وطئة اللي صار انه حادثة عرضية متل احداث الطيونة وخلدة وغيرها ببلد القتل عالهوية..

وجمهور الثنائي الشيعي اللي عم يصوبوا البوصلة بإنه الهجمة من طريق الجديدة مش من الضاحية وعم يشمتوا بإنه جمهور الحلفاء قبروا بعض..

واكتر المطمنين عم يرجعوا ينشروا غزوة الاشرفية بال ٢٠٠٦ وقت رسام دانماركي رسم كاريكاتور مسيء للنبي..

باختصار طلع الشعب المغربي الابي (لان قبل بيوم كان الشعب البرازيلي عامل مشكل مع الشعب الارجنيتيني بلبنان) طلع الشعب المغربي الابي ما في ينزل داون تاون في حرس المجلس في حرس الحكومة ومن تاني جهة في الضاحية الابية راح عالاشرفية حلفاء الخط السيادي تحمسوا زيادة شوي صدحوا الله اكبر سمعوا جنود الرب ونزلوا عالساحة وصار في التحام عيش مشترك وتعايش بين الهلال والصليب وصل للركب.

هلق الحماس اللبناني الزايد اكيد ما بضاهي حماس المغاربة اللي بس ربحوا ع بلجيكا نزلوا بكل روح رياضية حرقوا الدنيا ببلجيكا، واللي هلق ع شوي فرنسا عم تتحضر لسيناريو حرب اهلية بس يلعبوا ضد المغرب.. يعني نحن أصلا أمة راقية لا تجبرونا لا بالربح ولا بالخسارة بالعودة لجماعة المعلقين على غزي

وة الاشرفية (مصغر غزوى) عم يتساءلوا شو بصير اذا نزلوا اهل الاشرفية بجيباتهم على طريق الجديدة يحتفلوا بالعالم الفرنسي.. بليز لاحظوا لي الجيبات لان اهل الآش ما بيركبوا لا موتسيكلات ولا موستيكلات..

بيبقى السؤال الابرز شو جاب الدين والطائفية والهتفات الدينية على تشجيع الفوتبول؟ لان نحن بكل روح طائفية منحب انه نعلم حدودنا، كل واحد يحتفل ضمن تيريتواره اذا بريد..

قطر استضافت كاس العالم بكل الجنسيات ومشي الحال.. اما نحن كان عنا مباراة بين النجمة والانصار حيث تجسدت كل الاخلاق الرياضية والخبرة والتفوق على الذات بين شعبي النجمة والانصار لدرجة غطى مشهد الاشكال وتوقف المباراة على المشهد بقطر..

وعنا كل يوم مباراة بين منطقتين او طائفتين وهلقد بيكفي علينا.. بس يمكن هالغزوة ترجع تجمع بين الاخوة الاعداء ويقرروا اتنينهم سوا يحموا حقوق المسيحيين.

على الهامش كان زار الصهر المعجزة وعمه بكركي.. الارجح راحوا شكيوا المرشد الاعلى المحلي عند البطرك، وطلبوا منه يتدخل لحماية الموقع المسيحي الاول من المحمودات، بعد ما ضربه الميثاقية والدستور.. كتير عبالي اعرف مثلا اذا شخص متل البطريك بس واحد يحاول يتذاكى عليه اذا برد عليه بشكل صريح وبوقفه عند حده وبذكره بارتكاباته بالبلد او بس بسامحوا، واكيد طلع الراعي بعظة الاحد وطالب المجتمع الدولي بانقاذنا وطالب ميقاتي باستخدام صلاحياته بمسؤولية وعدم الاستفزاز، هلق ميقاتي قبل ما يعمل عمرة وتستقبله السعودية ومحمد بن سلمان شخصيا وكان عم يعامل نفسه انه رجل دولة، هلق مع كل الاضواء العربية عليه بعقتد اخد حقنة معنويات اضافية، بكرا بوظفها بالمزيد من المهاترات والقرارات لسرقة دم الشعب.

وزير الإعلام المحسوب ع فرنجية قال انه فرنجية مش مسؤول عن مشكل الحزب باسيل، وانه باسيل عنده سلبية بملف الرئاسة وما عم يطرح اسم يعني لا بده فرنجية ولا بده يطرح اسم ولا بده يزيح من الدرب.. وهيدا الشي بديهي لأنه بنظر باسيل في شخص واحد بيستحق الرئاسة هو باسيل شخصيا وهيدي كمان أمر بديهي وطبيعي لان الواحد بيرتقي بطموحاته وبيكبر من رئيس تيار الماخلونا، لرئيس جمهورية الما خلونا.

بس هو وضّح انه مش مرشح بس ما في شي اسمه لن يترشح، هيدا التوضيح اجل بمقابلة تفسيرية لشو ورد بالمؤتمر الصحافي من شي اسبوع، هلق لما نستعمل عبارات ما بتليق بالمقامات متل قبل السحسوح وبعد السحسوح.. بالمقابلة التوضيحية بوباي ما كان آكل سبينيتش طلع وضح مرمر السيد بالنسبة اله، ومركزه الخاص بحياته، ووضح انه هو لما قال الصادقون هو وآكل سبينيتش كان بيقصدها وما كان ابدا عم يتمسخر.. واكد هيك هو بالحجم الطبيعي وعقله براسه انه العلاقة مع حزب الل ه على المحك وما فرط اتفاق مار مخايل.. بس تأويله قصص ما قالها هو لزرع مشكل مع الحزب ولن ينالوا.. شخص السيد حسن له مكانة خاصة في عقلي وقلبي وافكر به بشكل مختلف عن كل الناس في السياسة في لبنان... اذا وضعنا جانباالجنرال عون، السيد حسن هو عندي "غير كل الناس هيدا الحكي من بعد ما بحسب المصادر رفض السيد يستقبله انا عم اقرا التويت كرمال التوثيق حتى بكرا بس يرجع يغير رأيه ويهاجم يكون عنا دوكومانت عن جد عبالي اعرف جمهوره يعني كيف قادرين بشكل دائما يتأقلموا مع المواقف هالفليكسيبيليتي بالتأقلم ملازم ناخد عليها شي جائزة نوبل او بالقليلة نفوت على غينيس بوك

قبل ما اختم ميريل ستريب لبنان الممثلة الموهوبة ستيفاني صليبا تم استجوابها باشارة من غادة عون، بتهمة تبييض الاموال لكبير اللصوص رياض سلامة، هيك نحن اصلا القضاء عنا مش استنسابي والامن عنا مش محسوبيات، الاستعراض تبع غادة عون اخد ضجته، وموديل الليرة اللبنانية فاتت عالتحقيق وضهرت، اكيد مش المطلوب من عامة الشعب تفهم شو صار لان عامة الشعب عندها مهام محددة الهتاف للزعيم انتخاب الزعيم باحسن الاحوال تشجيع منتخبات العالم بالفوتبول.. اما تحقيقات بتبييض اموال استعاد نواب ووزراء ما بيحضروا للتحقيق استدعاء قاضية

ان شاء الله موت اذا عم كذب بس تخيلوا معي المدعي العام المالي علي ابراهيم اللي قعد مع جبران باسيل ومع فادي عاشور مالك الايدن باي ومع رئيس بلدية بيروت ومع علي حسن خليل كوزير مالية سابق ومع فؤاد السنيورة وما قدر الا يحترمهم ويشربهم فنجان قهوة ويبعتهم على بيوتهم... بده يلاقي شي على ستيفاني صليبا؟ خليني ساكتة