خليني ساكتة ١٧٨ - كاس العالم للارجنتين.. بس نحن شحدنا باصات نقل مشترك !

منيح انه ربحت الأرجنتين لسببين الاول احسن ما يتحمسوا جنود الرب وينزلوا يعملوا ردة اجر على طريق الجديدة او يهاجموا مثلا قرى الجبل حيث يحلوا شرب المتي

والتاني قربوا يرجعوا الطليان على كاس العالم وبصير عندي حدا شجعه

بكل الحالات

بلش المونديال وما انتخبنا رئيس

خلص المونديال وما انتخبنا رئيس

ربحت الارجنتين وما انتخبنا رئيس

بلش وخلص المونديال وبعد ما عرفنا شو صار بمفاوضات ميقاتي مع بي ان لنحضر المونديال

حضرنا المونديال ما منعرف كيف

تماما متل ما عايشين وما منعرف كيف

وكمان متل ما البلد ماشي والاسواق ملياني والشعب معيد وما منعرف كيف

الدولار عم يسلم على ٤٥ الف ما بقى اصلا عم ننتبه بس يطلع او ينزل تماما متل ما مننتبه على تنكة البنزين قديه صارت

أسعار المحلات والسهرات بالدولار والتياب والروحات بالدولار بس كلنا عايشين وكلنا مبسوطين والاهم من كل هيدا كلنا عم ننق

الأرجنتين اخذوا كاس العالم بالفوتبول نحن منستحق كاس العالم بالشحادة والنق

حدا شاف مثلا وزير اللاشغال هو وعم يزف لنا خبر وصول هبة الباصات ووضعها بالسير.. يعني ولا مسبار الأمل وكإن يعني بعد بدنا خطوتان تلاتة ماكسيموم ومنوصل عالمريخ مباشرة.. حتى ما اضطرينا نمرق بمرحلة المترو او ناسا دغري من الانهيار على الباصات.. وعمل لنا ديمونستراسيون عن ركوب البص مع تغطية اعلامية من الطزار الاول بتذكر بصور قبطان الانهيار وقت اعلان لبنان بلد نفطي

منستحق كاس العالم وكمان تكسير الأرقام القياسية بانتحال شخصية بلد

اي نحن منتحلين شخصية بلد جميل ماشي والاهم انه العالم مصدقتنا، لبنان اذا بده يكون ممثل بكون ليوناردو دي كابريو واذا فيلم بكون فيلم ب كاتش مي اف يو كان

هو للحقيقة عم نشكل صدمة لزوارنا من اهلنا واصدقائنا وحتى السواح الاجانب، هلق شعارنا عيدوها بالشتوية، قصدهم للطلة اللي رحبنا فيها بالصيفية.

عم نلاقي شوي صعوبة قدام الاجانب من أصول لبنانية او غير لبنانية كيف بدنا نبرر كمية قطع ايدنا والشحادة عليها وطلبات الادوية والنق ع سعر كيلو اللحمة.. بالمقابل هيدا الاقبال على الحياة بكامل شغفنا.. يعني تحديدا نحن تفسير اسمع كلامك اصدقك اشوف امورك استعجب،

اذا السياسيين مش قادرين يتفقوا على خطاب موحد يعني لازم بالقليلة نحن نجرب نتفق نحن كشعب على خطاب موحد حول فقرنا، أو عدمه، حول يأسنا أو عدمه.. هيدي الازدواجية بالخطاب عم بتضيع السائح ما عم يعرف مين اللي حقيقة عايز منا ومين النصاب؟

بس هيدا الاسبوع اتفقوا على شي، وهو تقديم التعازي بالجندي الايرلندي اللي قتل بالجنوب، هلق بيطلع الخط الممانع وببلش يجلدني اي مذكرة انه في واحد ابيض انقتل بس بتتذكري كم واحد لبناني او فلسطيني انقتل على ايد اسرائيل.. وهنا تجد الاشارة، بإنه اول شي اللي انقتل مش اسرائيلي، وهيدا شاب تارك اهله وعيلته ليعمل شغله، شغله اسمعوا منيح الجوب ديسكريبشين تبعه "جندي في قوات حفظ السلام"، يعني هيدا شاب موكل حفظ السلام، قام وقع بين ايدين شباب الارجح بنفس عمره بس سن الكرامة والعزة ناقح عليهم.. باطل ما بفوت بدنس الارض بدواليب سيارته اغدقوا عليه محبتهم، ب ٧ رصاصات عالسيارة بس هو الحق عليه يمكن كان فاتح الشباك وقبل هيك ضيّع بالطريق

هلق حزب بكامله مضيع البوصلة والاجندة وطريق القدس وحدود بحرية البلد بكامله عادي بس واحد من قوات اليونيفيل يضيع الطريق باطل.. ارض الجنوب ما ممكن تحمل هيك انتكاسة

الكل قاموا بالواجب وقدموا التعازي، وهلق ناطرين نتيجة التحقيق، مين. بيعرف يمكن نقدر نعرف اسم مطلق النار وممكن لا، بس الارجح اذا عرفنا اسمه تتعلق يافطات تشكر الايادي او يتم اطلاق اسمه على شي شارع من الشوارع ومين بيعرف بعد شي ٣ سنين منشوفه نائب بالبرلمان.

على الهامش جمعية اخضر بلا حدود وهيدي الجمعية اسمها مدني بس هي بطابعها بتبع لحزب العزة والكرامة مهمتها التشجير على الحدود وغالبا ما بتعمل مشاكل مع اليونيفيل واسرائيل لان ذكية بوضع الشجر بطريقة تمويهية تغطي كاميرات المراقبة بس قد ما هي متفانية بالعمل وعملا باسمها بلا حدود طحشت على ضيعة رميش اللي هي مساقبة انها من الاخوان المسيحيين وهلق في تانشن بين عيتا الشعب ورميش لان اخضر بلا حدود صارت فجأة عم تنكش بساتين رميش

قبل ما اختم لجنة العلاقات الخارجية بالكونغرس الأميركي قدمت رسالة لوزير الخارجية الاميركية وكمان لوزير الخزانة طالبته فيها بوضع عقوبات على كل من يقوض حكم القانون في لبنان ومنخرط في الفساد، الملفت بالرسالة توجيه انتقاد لنبيه بري شخصيا كرئيس مجلس نواب لدوره في الاخفاق في انتخاب رئيس للجمهورية بحسب الرسالة، بس الاهم من كل هيدا انه الرسالة ل بلينكن ويلين اعادت ذكر الترحيب بالعقوبات التي فرضت بالاسم على جبران باسيل و جهاد العرب وداني خوري وجميل السيد، بتهم الفساد ... حدا يوصل له خبر انه الارجح الملايين اللي عم تنفت والزيارات على قطر ما كتير رح تنفع.. وفرهم ليومك الاسود

إن شاء الله موت اذا عم كذب بس نحن شعب ممكن يتعلق بحبال الهوا بس اذا بيعرف انه واحد منكم ممكن يتحاكم وينسحب حقنا منه.. خليني ساكتة