خليني ساكتة ١٨٠ - بداية هادئة بلا رئيس.. ورياض سلامة تحت مجهر المحققين الاوروبيين بمطلع الـ٢٠٢٣!

يمكن الواحد ليقدر يبلش السنة بتفاؤل لازم ينزل من الاكسبكتايشنز تبعه..

نحن الشعب العظيم منا والرتش كمان لازم ننزل من الاكسبكتايشنز تبعنا، يعني ما بصير إنه بالـ٢٠٢٣ تبقى عنا نفس المطالب وكل الوقت يبقى النق على الكهربا والدولار والغلا والادوية وحليب الاطفال وحقوق مرضى السرطان بالعلاج

اصلا هيدي النغمة صار لازم نغيرها، اولا لانها ما بتليق ببريستيجنا كشعب فينيقي الاصل، مسبع الكارات، ومالئ النايت كلوبز صخبا واجواء سعيدة.. اللي بشوفنا بالنيو يير والنيو يير ماينس وان والنيو يير ماينس تو، ولا بقول اننا نحن ذاتنا تبع طوابير البنزين والمصارف والافران.. والسبب التاتي بتغيير السيمفونية الحزينة انه لازم نتفاءل بالخير لنلاقيه، واذا ما لقيناه بال ٢٠٢٣ رح يصير الموضوع كتير اصعب بالسنوات اللي بعدها، لإن بتكون اخدت علينا بشكل حقيقي نبوءة كبير اللصوص رياض سلامة ونكون تعودنا.

هلق من الامور التي تدعو للقلق مع بداية العام اننا بعدنا بلا رئيس، من هون عم اطلب منكن نفكر out of the box لشو الرئيس تحديدا، شو بقدم؟ شو دوره؟ اذا ما كان رئيس ع قد كلمته شو بدنا فيه؟ تعودنا عالرؤوساء اللي بتوعد وبتوفي قال لنا الرئيس السابق اخدكم ع جهنم وصدق.. فهلق طالع بمطلع العام البطريرك الراعي متفائل وانه بده انتخاب رئيس جامع المكونات الوطنية، المصيبة انه كل فريق بالبلد بيطبخ الطبخة على ذوقه وبتتحول المكونات الوطنية لملعقتين طائفية كبار مع ملعقة صغيرة حقوق مسيحيين ورشة عزة وكرامة مع صوص مرشح المرشد الاعلى المحلي او لا أحد... بعدين فينا بال ٢٠٢٣ نبطل تدوير زوايا ونسمي الاشيا باسمائها اذا كل الوقت بدنا نتوافق ع رئيس ليه ما بصير الرئيس بالتعيين مش بالانتخاب يعني بالقليلة بصير اكثر انسجاما مع الخط الوطني بالبلد.

على سيرة الانسجام، الاجواء بين حزب الله والعونيين قاتمة، لدرجة الحج وفيق بالكاد اتصل مهنئا بالاعياد وغاب وفد التعايش المشترك اللي عادة بزور عون وباسيل بالاعياد.. من جهة تانية الاهالي ببريح بالشوف انسجموا شوي زيادة على الميلاد وراحوا رسموا جماجم على بيوت اخواتهم بالوطن بس الحادثة انقضت على خير الكل استنكر واكد على الانسجام الوطني الحاد.

اما من الامور المقلقة حقيقة انه جايي وفد قضائي اوروبي للتحقيق مع رياض سلامة، وهيدا في كثير من الانسجام الاوروبي مع لبنان كوطن مزدهر نموذج بالاقتصاد الناجح والحر، بس فيه من التجني على كبير اللصوص رياض سلامة، انا شخصياً ما بقبله مش مستنضفة هيدا الوفد خصوصي وانه في بيناهم المان، والالمان حذروا انه معدل التضخم المتوقع بال ٢٠٢٣ ببلدهم رح يوصل لل ٧٪، وانا خايفة للصراحة يكون هيدا الوفد ما هو الا غطاء لمحاولة نسخ التجربة اللبنانية الاقتصادية، او اخذ عينات من اكسير ذكاء رياض سلامة بالهندسات المالية يعني بلد وصل معدل التضخم فيه لل ٢١١٪ بال ٢٠٢٢ ومن دون توقعات او اسقاطات، هيك كانت ارقام مفاجئة تليق بالوطن مثلا ارتفعت مجموعة المواد الغذائية والمشروبات غير الروحية بـ 363.7%، بينما ارتفعت مجموعة الصحة بـ 468%، ومجموعة النقل بـ 515%. بعدين اليورو عم يلعب لصالح الدولار، انا اكيدة هول المدعين العامين رح يسرقوا فكرة صيرفة، ومن هون كانت الدعاوى العالمية ع رياض سلامة من الاول، كان الهدف تقييد حركته لما يروح يسجل براءة اختراع بصيرفة والدولار الجمركي، وكيف تعامل الدولار على اساس انه مغيطة، ليرجعوا يجوا يسرقوا الافكار النيرة.. بس اذا فكرههم نحن مش منتبهين بكونوا غلطانين، رح نكون الهم بالمرصاد وغسان عويدات رح يطلع ويقول لن يمروا.. لإنه في انتهاك لسيادة القضاء، هيدا القضاء اللي لا غبار عليه.. نموذج النزاهة والشفافية، اصلا ليه جايين المدعين العامين من لوكسمبورغ لو ما جايين ليستنسخوا تجربتنا بعالم القضاء، وياخدوا در.. بعدين واصلين على زنبقة القضاء غادة عون، ينهلوا من تجربتها بخلع الابواب وكسر الاقفال.. وحده اللي ما رح يقدمه عليه هو القاضي شادي قردوحي، لان النموذج من القاضي النزيه غير التابع للاجندات ما بهمهم هول الاوروبيين عندهم منه كتير بفضلوا يستثمروا وقتهم بتعلم قصص جديدة.

على الهامش لفتني اصلا توقع لليلى عبداللطيف، قال المقاومة بتسجل انتصار جديد، على فكرة اذكى باصرة بالكون ليلى عبد اللطيف هيك دايما she states the obvious، كإنها ما بتعرف انه تعليق يافطة عليها صورة سليماني بأرض الضاحية الابية هو انتصار للمقاومة بحد ذاته

قبل ما اختم كانت نهاية صاخبة للعام الماضي فشر ماتش فرنسا ارجنتين عالنهائي، فشر الكلاسيكو برشلونة - ريال مدريد، فشر ماتش نجمة انصار.. هيك اللعب عالكبير او بلا..

نزل الرئيس السابق ميشال عون بجلالة قدره على الاو تي في ليعوض غياب مايك فغالي عن الشاشة، تحمس كتير ولانه بحب يلعب عالكبير صوب على النبيه، وما ارداك ما النبيه، اللي رد ردا مدويا، وبلش القصف الكلامي والتراشق الاعلامي بين الأفواج والعونيين.. عون هاجم بري وبري رد ع عون وعطالالله رد ع بري ليرجع قبلان قبلان يرد على عون.. بس بما ان الدنيا اعياد كانت الوحدة الوطنية تحت الشجرة اقوى من انها تتطور الامور.. وسجلت الكواكب الصراع على الساحة اللبنانية على انه حادثة عابرة بين نجمين عم بتضيق عليهم السما من كتر الانجازات وحماية البلد من الانهيار.

ان شاء الله موت اذا عم كذب نهاية ال ٢٠٢٢ لطيفة علينا كبلد نجينا من كارثتين الاولى لما السيطرة على الزورق غير الشرعية بسلعاتا باقل خساءر بشرية ممكنة.. والتاني احتفلت فيه وزارة الداخلية واصدرت بيان انه تكلّلت عملية حفظ الأمن... بالنجاح... وكما أصيبت طائرتان خلال تواجدهما على مدرّجات مطار رفيق الحريري الدّولي.. بدي افهم شو كانوا عم يعملوا طيارات على مدرج المطار؟ اصلا هو المطار شو عم يعمل محله؟ ليه زارك نفسه على حدود الضاحية الابية والاوزاعي؟ بس هيك مؤامرة برعاية هول السواح اللي بتبقوا كل الوقت مجلوقين فيهم وبتعملولهم حملات.. هيدا المطار موجود ليضيق على العالم ويمنعهم يقوصوا بالعالي بس يغضبوا وبس يفرحوا... خليني ساكتة