ميقاتي بده يعقد جلسة حكومة كرمال الكهربا، لان الكهربا صارت مقطوعة ٢٤/٢٤ بكل لبنان، عن جد مللا خبرية، بس يسمعها الواحد بيعرف قيمة الموتور، يا مضوي لنا حياتنا يا مشعشع لنا ايامنا، كل دولار عم تاخده بمحله لولاك يا موتور شو كان بده يصير فينا، اهم شي رابطة اصحاب الموتورات ما شي يوم تقلل عقلها وتسلم نفسها لتيار الافقار والتعتيم، او بكرا جبران باسيل بس ياخد حجمه بالحكومة الجديدة بعد انتخاب رئيس هو مش راضي عنه يروح يعرض خدماته عالموتورات بتكون راحت علينا دنيا وآخرة.
ايقونة تيار الافقار والتعتيم يعني البواخر فتحت حرب كلامية بين ميقاتي ولمبة لبنان ندى البستاني اللي حقيقة جرأتها بتنقز خصوصي لجهة تنظيرها بملف الكهربا، نسيت انها كانت وزيرة طاقة وقبلها مستشارة وزير طاقة ومستشارة مستشار وزير طاقة، وإنه لو في من خبرتها ومعلوماتها أي فائدة ما وصل الوطن لصفر كهربا.
وحزب العزة والكرامة محتار بروح ع اجتماع الحكومة او براضي باسيل، بس مش كل الاخبار هيك معتمة، نعيم قاسم طمنا انه رجع من إيران والوضع هونيك مستقر والحياة عادية ونشطة. إيران تتقدَّم وتتألَّق”. إي وقآاني شخصيا مبسوط من أدائنا كيف رسمنا الحدود البحرية من دون ولا طلقة رصاص وبس باجتماعين بفضل المضحي المرشد الاعلى المحلي عنا، اللي بدوره طمنا بإنه هو ملتزم الحوارات واللقاءات الداخلية، وانه هو ما بحب مناقشة الامور بالاعلام والانتقاد وعلى الملأ بفضل الانتقاد عالواطي والنقاش عالسكت، انه مثلا بوشوش الحج وفيق اسم الرئيس الجديد وهو بوشوشه لبري وبري بوشوشه لباسيل هيك متل التلفون كاسيه..
هلق اذا باسيل بقي معند وقرر يغير الاسم بس يوصل لعنده قال هو ما فهم او سمع منيح، قال له نصراللـه “إذا كنتم تشعرون بالحرج بالتحالف معنا فأنتم غير ملزمين"، هلق جماعة التيار فهموا الحديث بإيجابية وتلقفوه بأيادي فتوحة واعتبروه خطوة لتطوير العلاقات، ما انتبهوا انه كان عم يقل له لباسيل بكل أناقة انت بتعرف حجمك الطبيعي خوده أحسن ما نضطر نحكي على العالي، خصوصي مع التأكيد على انه المقاومة مش بحاجة لحدا يحميها، هي حامية الارض والسيادة والعزة والكرامة.
على سيرة السيادة شطفوا قصر العدل وعم يحضروه لاستقبال المحققين الاوروبيين اللي بدهم يحققوا على ١٢ يوم مع اشخاص بتهمة تبييض الاموال، جبل بعبدا السابق ما هان عليه وغرّد بكل أناقة مستنكر تدخل القضاء الأجنبي بالقضاء اللبناني، وقال "سقوط القضاء اللبناني فتح الطريق لتدخّل القضاء الأجنبي”..
ولإن الكل حريص على السيادة قبل كل شي تقصى القاضي غسان عويدات طلوع نزول اذا في خرق للسيادة، واطمن انه السيادة محفوظة على الارجح تأكد من انه السيادة بخير وقت اللي طلع انه اسم رياض سلامة مش وارد بين ال ٢٠ شخص اللي بده يتم استجوابهم، وهيك حطت الدولة كلها اجريها بمي باردة. واولها كبير اللصوص رياض سلامة اللي بلشت حملة التبخير لأله ولضرورة التمديد، وإلا بغياب رئيس جمهورية عدم التمديد بيعني انه مرركز حاكم مصرف لبنان بروح لشيعي، وما ادراكم لما الشيعة ياخدوا منصب بالبلد، يعني اصلا انا برأيي الموارنة لازم يحافظوا ع رياض سلامة بمنصبه لانه الوحيد اللي بنافس الرئيس بري.
كبير اللصوص بتخلص ولايته بحزيران، واذا سيناريو التمديد اله ارتفعت حظوظه هيدا الشي بيعني انه ما في رئيس قبل حزيران على عكس ما عم بقول ريفي المتفائل بإنه الرئيس جاية بنيسان، انه ما بعرف ليه بنيسان مثلا؟ ليكونوا بدهم يهدوني رئيس على عيد ميلادي؟
كتير بحب طريقة كب المواعيد، ورسم العناقيد، لا حدا بيعرف كيف ولا ليه، انه شو الارتكاز العلمي انه الرئيس جايه بالربيع؟ قال البلد ما بيحمل ليه هو البلد كان بيحمل فراغ يوم واحد؟ وهياه شو فرق الرئيس او عدمه؟
او هيك بس عنوان جديد من العناوين اللي بدكم تلهوا فيها العالم الفراغ ومن بعدها تشكيل حكومة فتعيين حاكم مصرف لبنان وتعيينات امنية ما ننسى انه سوبرمان الوطن بتخلص ولايته بهد شهرين، هلق صح هو وعدنا انه باقي بتحمل مسؤولياته الوطنية بس يا ويلنا من بعدك يا لواء ابراهيم شو بدنا نعمل من وين بدنا نجيب مبعوث محلي ٣ دي ملحق على كل الخلافات الداخلية والخارجية.
بس ما رح يتركنا بلا باسبورات وعدنا اللواء انه الباسبورات راجعة ب ١٥ شباط، هلق ليه ب ١٥ شباط ما لازم نكتر اسئلة، ما بيعجبنا لا اذا انقطعت الباسبورات ولا اذا رجعت، هي هيك الامور بالبلد متل عجقة السير لا بتعرف ليه في عجقة وليه فتحت الطريق ودايما العجقة على ميلة والميلة التانية عم تتفرج وتستنكر ييي وحرام وليك علقانين يعني تحديدا تحديدا متل وضعنا بس نكون بمطحنة حياتنا اليومية وما عم نفهم كيف العالم بعدها قادرة تعيش، وبس نروح نسهر ونلتحق بركب محبي الحياة وطائر الفينيق.
على الهامش لفت لهم نظرهم للقوات اللبنانية وبعض الاحزاب الاخرى كيف مجلس النواب الاميركي بقى مجتمع وكان يعقد باليوم ٣ جلسات لحد ما انتخب رئيس وطالبوا الرئيس بري بإنه يعمل نفس الشي لحين انتخاب رئيس.. شفتوا هيدا الخط السيادي اللي بدكم اياه؟ عم ياخد نموذج اميركي بالديموقراطية وبده يطبقه بالبلد؟
قبل ما اختم قال وزير الاشغال اسرائيل عم تطلع شائعات على مطار بيروت انه عم بصير في تهريب اسلحة عبره، وانه الهدف من الشائعات النيل من دوره في المنطقة، انتو مستخفين بالدور اللي عم يلعبوا المطار بمنطقة الاوزاعي والرمل العالي؟ اي شو مستخفين بأهمية مطارنا من أهميته جهاد العرب والدولة العظيمة حطت حده مطمر نفايات، صار المطار الأول بالعالم بإغتيال الطيور، بعدين وين في مطار متواضع لدرجة هو والرصاص الطايش جيران.
إن شاء الله موت إذا عم كذب بس في عريضة لمناصرة القاضي شادي قردوحي بمعركته ضد الاستفراد فيه من قبل المنظومة وقضائها، العريضة الها اكتر من ٧ اشهر لهلق بعد ما قدرت تجمع ١٠ الاف توقيع، اذا كبسة زر عالسوسيل ميديا اللي قاعد شعب بكامله عم ينق من ورا شاشاته ما عم يتحرك هيدا الشعب ليعملها لانها ما بتخص زعيم او طايفة.. بدنا ننتظر انتفاضة جديدة على الواقع؟ خليني ساكتة
