خليني ساكتة ١٨٢ - الضحايا بالتحقيق والمشتبه فيهم عالكراسي… روحوا بلطوا البحر!

قضاء حسّاس، بينخدش ازازه بسرعة

قضاة حانين بتفر دمعتهم بسرعة

قضاء عنده من نفسه ما بيسوى لحدا يطاول عليه،

قضاة بدهم نمضي تعهد بتظاهرات سلمية ما بحبوا العنف من هيك عم يستدعوا الاهالي بس التفجيرات سلمية ما بترشق حجارة

قضاة شغلهم بيحكي عنهم

روحوا بلطوا البحر ازعجتهم

بس انهم راحوا فجروا نص المدينة عادي

وليام_نون يعصب ويهدد قصر العدل بالاعلام لازم تتحرك الدولة كلها مش بس القضاء

بس الحج وفيق يهدد قاضي بقبعه شي اكتر من طبيعي لإنه هدد برواق ما صرّخ ما عيّط ما رفع الصوت

ما انتو بتعرفوا انه آخد طباعه من المرشد الأعلى المحلي اللي ما بحب يناقش بالاعلام بحب يناقش عالسكت

الضغط السوشيل ميدياوي والشعبي المستنكر لاستدعاء اهالي الضحايا تدخل سافر بالقضاء، بس قضاة غب الطلب لأجندات سياسية عادة

لو القدر كان ارحم مع وليام وعيلته كان عندهم قطعة من تياب خيه اللي استشهد فيهم، بلكي كنتوا لقيتوا ببيته آثار نيترات لإنكم عارفين انه ما في ديناميت ببيته

الملفت أكتر من وقاحة المنظومة وقضائها بتوقيف وليام واستدعاء أهالي الضحايا، هي فجور العفن العوني المسترشي على السوشيل ميديا، يعني بعد انعدام فرصة تسجيل نقاط عالحليف، العونيين عم ينتصروا لحقوق المسيحيين عبر وليام بحملة هجوم بالشخصي، بس ما لازم نستغرب لإن العونيين بدهم كل العالم متلهم يمضوا على دم أهلهم أوراق تفاهم، وينسوا قضاياهم متل ما نسي جنرالهم قضية المفقودين بالسجون السورية وضحايا سقطوا بمجازر على قاعدة أعطني الكرسي وخد ما يدهش العالم.

ومن الدهشة بمكان قرب انعقاد جلسة مجلس الوزراء بحضور وزراء حزب العزة والكرامة الحريصين علينا إنه تشعشع حياتنا، ضربتين عالراس بيوجعوا لباسيل.

عم يطلع على التحالف وعم يسمع صوت من بعيد: انظر الى اتفاق مار مخايل يحترق وتحترق معه أي آمال لك بكرسي الرئاسة.

هلق التسريبات بتقول إنه عمه إشرأب وقال "حزب الله" إلى الامعان في خرق الدستور وعزل مكون أساسي، فأنا شخصياً الذي وقّعت تفاهم مار مخايل سأخرج إلى العلن لأمزق هذا التفاهم وأرميه في سلة المهملات"... ورجع طلع نفي وتلطيف للحكي

بس اللي بيعرف جنرال تيار الزنار ونازل، رجال يقبرني رجال، بيعرف انه مش غريب عليه يقول هيك وخصوصي انه راحت مفاعيل الجملة الحزباللاوية الشهيرة "شرف للبنانيين أن يصل الرئيس ميشال عون ببندقية المقاومة".. اي ما هيك علاقات مبينة على عدم الشخصانية بتصمد في وجه العواصف العاتية..

شو بدنا هلق بالحكي الداخلي اللي ما بطعمي خبز، ولا بيرسم خرائط سياسية، متى حضر الماء بطل التيمم، ووزير الخارجية الايراني شخصيا كان عنا، مطمئنا جمهوره وخطه السياسي ليعمل توازن بالبلد، وكان هادي ومش مشغول باله علينا ونصحنا ننتخب رئيس.. ولإن هيك زيارة عزيزة كتير على قلبنا دغري بتتدغدغ مشاعر الطايفة، مثلا رئيس بلدية الغبيري ما قدر يضبط فرحه، طلع منحه مباشرة أرض ملعب الغولف ليعمل عليه معمل كهربا للضاحية.. وغرد نعم لمحطة كهرباء لبيروت والضاحية وجبل لبنان على ارض الدولة في نادي الغولف في الغبيري.

قد ما قوي معن الخليل راح نقّى المساحة الوحيدة الخضرا بكل الضاحية، وقرر منحها لمعمل الكهربا هيك بنص دين البلد.. يعني وين بدكم يحطه للمعمل معقول مثلا يعملوا تسويات للاوزاعي، أو الرمل العالي، أو العشوائيات؟ أكيد لا طبيعي ينقي ملعب الغولف، اصلا الغولف غريب عن البيئة، نحن بيئة ما بيلبق لنا نشم الهوا اذا ما كان مسرطن.. السرطان أساس بالصمود بوجه العدو الصهيوني الغاشم.

على فكرة كبير اللصوص قاعد عم يلعب مونوبولي على صيرفة، مش كتير هامه لا الوفد الاوروبي من المحققين ولا حتى مرصده، طالما بلش راسم الخط الأحمر ينتبه إنه في مؤامرة لتفريغ المراكجيته، إي الكونسرفاتوار عنده وزير خارجية إذا ذكرت اسمه يمكن يلاقوه بينفع خيار تالت لرئيس جمهورية بسبب امتداده العائلي، المهم انه وزير خارجية الكونسرفاتوار واثق بالرئيسة اللي من مميزاتها غير انها بتاخد قراراتها بالتشاور مع نفسها، بتتمتع بغطاء إعلامي خاص، والأهم من هي

قبل ما اختم في شتلة جديدة طالع ع تويتر، هلق من مميزات هالشتلة بالذات انه ما بتعرف من وين مستمدة قوتها، شتلة بتايتل رئيس حزب الاتحاد السرياني، قد ما هو ضخم هيدا الاتحاد كبرت الخسة براس رئيسه، اللي نشره الفيديو عم يقولوا انه قوات، والقوات عم ينشروا صوره لما زار جبل بعبدا من كم سنة، يعني لهلق مجهول الجذور ومن بعد ما كان عامل زيارات للقصر الجمهوري من شي سنتين وملمع صورته، متل الفطريات اللي ما بيعرف الواحد كيف بتفرخ،راح حاضر كم معركة ويمكن عامل دورة g pub ونازل فينا بده يسحل ويعلق مشانق ويقسم البلد ويعزل مناطق ويجرجر..

على كل حال عم حاول اتخايله اذا كان واقف عالمرايا عم يخطب بجماهيره، وقطعت من تحت بيته شي دورية موستيكلات.. شو ممكن يعمل

إن شاء الله موت إذا عم كذب بس عم تزيد القاب هالسلطة مش بس فاشلة فاسدة مجرمة وكمان بوليسية وفاجرة، بدها تروِّع أهالي الضحايا ليوقفوا يطالبوا بحق أولادهم..مع قاضي أصلاً مشهود بملفاته وتبعيته يعني متل ما بقولوا سماههم بوجوههم وكمان بقضاياهم.. كل عمركم عم تمثلوا علينا انه في بلد تمثيل بالسياسة وتمثيل بالاقتصاد وتمثيل بالعيش المشترك وصلتوا على قضية المرفأ ووصل فجوركم لدرجة حتى ما بدكم تمثلوا انكم عم تحققوا.. نحن رح نضل نصرخ ونعلي الصوت ونطالب بالعدالة أما إنتو اللي ضد التحقيق بجريمة العصر مع كل سياسيينكم وقضاتكم وغنمكم روحوا بلطوا البحر... خليني ساكتة