خليني ساكتة ١٨٤ - تعا قلو ليه عامل معركة وجودية ضد مشهد تلفزيوني.. بيزعل!

ما في جلسة لانتخاب رئيس هالاسبوع قصاص لنواب نوتي ما بيسمعوا كلمة الاستيذ

بكرا بس يرجع بده يعطيهم قصاص كل كلمة بلون بن أطالب بتطبيق الدستور بعد اليوم

مش قليل تعمل له وجعة راس هو اللي فني عمره عم يكتب سيناريوهات هيك بيجي حدا بيطلع برات النص. ويشجع مجموعة من النواب أعلنوا تأييدهم ودعمهم التام للاعتكاف وأساسه الدستوري ومنهم الكتائب ومجموعة من المستقلين، ومنهم اصحاب البعد التكتيكي بس دعموا الأساس الدستوري للاعتكاف.. بشي نائبين من كتلتهم هيدي بعد ساعات طويلة من الصمت ودرس القرار متل القوات، وفي كاتيغوري خاصة للأشخاص أصحاب النظرة الثاقبة بالحياة، وهيدي انفرد فيها الياس بو صعب من خلال ابداء تعاطفه وتفهمه لحركة النواب، ميرسي يكتر خيرك. هلق اكيد هالاسبوع بيطلع لنا كم موديل تاني متل حدا عباله يتضامن مع النواب لانه هو من اشد المتعطشين لانتخاب رئيس بس ما خلوه.

جائزة بعد النظر بالتعامل مع اعتصام نواب التغيير بتروح ل تطنيش الممانعة انه سياسة طنش تدم ما في شي عم بصير بالمجلس، والامور ما خرجت عن السيطرة.. اما جمهور الممانعة خاصة بشق الثنائي فمشغول بغير شي كليا، عنده معركة وجودية بوج اسكيتش لمحمد الدايخ وحسين قاووق..

بصرف النظر عن رأيي الخاص بالسكيتش اللي انا بكل أمانة شفته أقل بكتير من المستوى اللي الشباب كانوا عم يقدموه من قبل، بس هيدا ما بيمنع انه رد الفعل على هيك اسكتشيتات مش شوي مبالغ فيها؟ يعني هيك سمحتوا للطابور الخامس يتسلل ويكب قنبلة عال ال بي سي، انا بقول انه اللي عملها تحمس، قد ما شافكم نازلين بكل قوتكم عالسوشيل ميديا عم تنشروا استشهاد وجرحى وعمليات عسكرية للرد على هيك اسكتش، ما حمله راسه راح نفذ عملية دغري منيح انقضت بقنبلة..

مثلا يعني كان فيكم بكل بساطة تعتبروا هال٣ دقايق بأهمية اعتصام النواب للمطالبة ببناء بلد بالنسبة الكم، أو بنفس تأثير دولار ال ٥٠ الف على حياتكم اللي مستتكم ببيوتكم، كنتوا بتقدروا ما تعبروه للبرنامج من اوله لاخره، تطنشوه، و يبقى صدى الحلقة محصور بهالكم واحد اللي حضروها.. بالاملية يعني عم بتكون ردة الفعل أهم من أهم كاريكاتير ممكن ينرسم عن الطايفة.. اذا طايفة بكامل عتيدها وعتادها بهددها كلمة او اسكاتش "بلا طعمة"، يمكن المشكلة بالطايفة مش بالاسكيتش

بالشأن السياسي، حزب الله زار جنبلاط اللقاء كان بليغ لان البيك كان معزب حاله عامل دوفوار ومقدم اسماء، بس الحزب قال عالسكت من باب تمسكه بالحوار انه بده فرنجية لانه الوحيد اللي بيتأمن له ما بحب يقول بالاعلام..

بس البيك ما عنده مشكل بالنتيجة الاسم بالنسبة اله تفصيل المهم هيدا النوع من الزيارات يبقى ماشي، عنده بعد نظر دايم، وأكيد خايف ع حقوق الطايفة اللي كمان هدد كيانها اسكيتش تلفزيوني عملته أريج الحاج.

هي الفكرة اللي ما عم ينتبهولها لا الطوائف ولا الزعماء، انه هو المشهد العام للبلد صاير كاريكاتيري، يعني في شي كاريكاتيري اكتر من انه يطلع مروان خيرالدين عشية التحقيق معه عالتلفزيون يطمنا على مسار تحقيق الوفد الاوروبي بتبييض الاموال ومن اهم اقواله، انه هلق لاحقين ٣٠٠ مليون دولار وهو قصة لبنان بالمليارات، انه لازم يبينوا ال ٣٠٠ مليون دولار بس مش هني رح يحلوا أزمة البلد؟

او في شي كاريكاتيري مبكي أكتر من طفل عمره ١٢ سنة ينصاب برصاصة طايشة بضهره وتمرق عادي هيك ما كإن صار شي؟ هيدا ولد امه باعتته يلعب فوتبول لإن بدها عم تحلم تشوفه ببدلة مرتبة سينيه حامل كاس العالم متل ميسي.. او مش من حقنا نحلم لاطفالنا بالحياة لازم كلنا نكون صبة وحدة بالبلد؟

في مشهد كاريكاتيري اكتر من مشهد جمهور ماتش فوتبول هاجم على الحكم كرمال قرار ما عجبه ببلد مش منتبه انه سلطته كل يوم بتاخد قرارات جديدة بتجويعه وسحب دمه؟

بس نحن شعب ما منقدر للصراحة، هو مش قصة في انعدام امن وأمان بالبلد، انه السلطة تاركتنا نواجه احتمالات موتنا بأريحية، هيدي ديموقراطية، أي تدخل من السلطة بتسيير أمور المواطن يعتبر تدخل سافر شؤونه الخاصة، يعني في ديكتاتورية أكتر من شرطي واقف عالاشارة عم يمشي السير؟ ويوقف بوجه الكرياتيفتي اللبنانية بالمطاحشة، ما هو البلد مدينة ملاهي بالتونيلات مدينة الاشباح وعلى الاشارات متل ال بومبر كارز، وعالمطبات متل الرولير كوستير، وعالجور متل الفور دي.. وبالاقتصاد متل تروث او دير… وبالاقتصاد متل لايزر تاغ. نحن بلد مسلي بس مش مقدرين قيمته.

على الهامش طلاب المدارس الرسمية بعطلة مفتوحة قاعدين بالبيوت، بانتظار البنك الدولي والانروا، دايما الحق على الاجانب معقول يعني بنك دولي عم عم يدينا، دين دين ما عم نطلب منكم تعطونا، صح تخلفنا عن دفع القروض قبل وكمان عم نتأخر للدفع للأمم المتحدة الاشتراك، بس بالنتيجة عم ندفع، الدولة ما بتاكل حق حدا من الخارج، بس بتاكل حق مواطنينها. بعدين دول الخليج وينهم يتبرعوا لنا ب شي ١٠٠/٢٠٠/ ٣٠٠ مليار يسرقوهم زعمائنا بدل ما يحطوهم عالفوتبول، ايه بشو مقصرين معكم نحن؟ ما بيذكركم المرشد الاعلى المحلي عنا بكل خطاب وبيغدق عليكم محبة واخوة وصداقة؟ غير التصدير في شي نوعية وصلتكم مضروبة؟ وكان صدرنالكم ليمون صدرنالكم حتى بقلاوة صدرنالكم

بالشأن الخارجي اجتمع واجمع الزعماء اجمعين في لبنان من اقصى يمينهم المتطرف الى اقصى احزابهم المتشددة على استنكار التعرض للاديان بالسويد، جماعة متابعين ما يجري بزواريب أزقة السويد، ما العنبر رقم ١٢ كان اقرب لكم.. اجماع لم نشهد له مثيلا حتى مع حرقنا النا وتفجيرنا اربا اربا..

كمان خارجيا ايران هددت أوروبا باستهداف مصالحها بآسيا إذا صنفت الحرس الثوري الايراني بالارهاب..اصلا هيدا التهديد بالذات تأكيد على انه الحرس الثوري الايراني ما هو الا قوات للحفاظ على سلامة الاشجار الخضرا.. على امل ما يعتبر حاله الجناح المدني اللبناني معني بنفيذ التهديد

قبل ما اختم رئيس حكومة العدو الاسرائيلي الغاشم أقال وزير داخليته لانه أدين بالاحتيال الضريبي العام، وشعب العدو الاسرائيلي الغاشم نزل بالالاف للشوارع احتجاحا على إصلاحات مقترحة لإصلاح ترشيحات المحكمة العليا عبر لجنة مراجعة، وتمكين البرلمان من إلغاء أحكام المحكمة العليا… يعني بمعنى آخر المستوطنين عم يتظاهروا ضد أي تدخل سياسي بالقضاء… يمكن لازم يسارع نتانياهو ويتدرب على ايدي زعمائنا ليعرف كيف بتتعامل الدول مع الفاسدين، ومع القضاء.. والاهم يلحق تمويل المنقوشة ليعرف اي سفارة حركت له شعبه.

ان شاء الله موت اذا عم كذب بس هيدا البرنامج بلش قد ما كانت عم تخنقني العيشة بمطحنة وطن النجوم، وما عم اقدر عيش بال buble تبع آخر همي… بالنسبة الي خليني ساكتة مش لبث الامل، خليني ساكتة بنقل المشهد العام متل ما هو.. والمشهد حاليا بقول اننا ثورة بلا ثوار.. وثوار بلا اعلام.. واعلام بلا قضية.. وقضية بلا جمهور.. والجمهور عند الطوائف والطوائف عند الزعما والهوا بدو خيمة والخيمة بدا خيطان والجارة بدا قمحة و القمحة عند الطحان… خليني ساكتة