خليني ساكتة ١٨٦ - الزلزال أرحم منكم علينا.. العدالة لو سقطت السموات!

على ما يبدو انه الطبيعة والقدر اكتر رأفة فينا كشعب من طبقتنا الحاكمة، تخايلوا لو لا سمح الله ضربنا زلزال مع كل الحالة اللي نحن عايشين فيها، بكون اكيد المسؤولين زعلوا انه ما تدمرنا بشكل حقيقي لإن كان صار في مؤتمر دول مانحة ليقدم لنا مساعدات واثبتوا لنا انه العالم ما رح يتركنا، انا شخصيا حسيت ان الحمدالله عالسلامة الصبح كتير لابقة علينا اكتر من صباح الخير.

طبع الاسبوع الماضي شعار العدالة لو سقطت السموات

شعار رُفع بذكرى اغتيال لقمان سليم التانية، بخيمة مطلة على مرفأ بيروت اللي مرق سنتين ونص على تفجيره

القواسم المشتركة بين الاغتيالين كتيرة، أهمها انه الموت الطبيعي بهالبلد صار luxury، ما حتى عم يعطونا وقت نخلص حدادنا على ضحية بكونوا اغتالوا حدا تاني او ارتكبوا بحقنا مجزرة جديدة.

منظمومة فاسدة ومجرمة محمية بالسلاح، متحكمة برزنامة حياتنا، حولت لنا تفاصيل حياتنا لذكرى بعدها ذكرى تليها ذكرى. منظومة تمعن بالتنكيل فينا، قبل ما ينشفوا دموعنا على الدم اللي نزل ببكونا على أموالنا وقبل ما نلحق نتعود على فقرنا بينقلبوا على العدالة.

بقضية تفجير المرفأ، المحقق عدلي رح يقتل حاله ليمثل قدامه مستدعى واحد وما في شي، بس غسان عويدات اعطى امر بملاحقة الصرافين ليضبط الدولار، هلق صحيح غسان عويدات بده يطير حق ٢٢٠ ضحية غير الجرحى، بس عم يساعد رياض سلامة بإنه يكمل لعب بالوقت الضايع وعم يلجم الدولار، بعدين شو أهم هلق بهالحشرة؟ انه الدولار يبقى ليومين تحت ال ٦٥ الف او انككم تعرفوا مين فجر مرفأ بيروت وقتل لقمان سليم؟ انا بقول ما ممكن قاضي بيطلع منه قرار بأهمية ضبط الصرافين وسحبهم من الطرقات ومن تحت الجسور يكون ضد العدالة بتفجير بيروت، اصلا بيكفيه شهادة نقيب افران بيروت وجبل لبنان بالانجاز اللي عمله.

بيطار أجل جلسات الاستماع تبع شباط، غريب مع انه رأس الكنيسة واقف بصفه، صراحة ملتبسة عليي شوي الامور مع غبطته، كتير عم يتطبع من البرامج التلفزيونية الكبيرة، انه بيطلع كل أحد بمقدمة الاسبوع بيصفقهم بهدلة للطبقة السياسية واحد واحد ومن ثم بيستقبلهم واحد واحد وبيدعيهم للاجتماع عنده لحل موضوع الرئيس

يي صح بعدنا بلا رئيس، قديه صار لنا بلا رئيس؟ شي ٤ اشهر، واعتصام نواب التغيير بالبرلمان ملحم خلف ونجاة عون بعده مستمر بالزمهرير، انا شخصياً بدعيكم تفكوا اعتصامكم، أولا حرصاً على حياتكم بهالبرد وتانياً وباختصار لإننا شعب ما منستاهل، انا بأكد لكم اذا بكرا بتنزل كاميرا بتبرم لبنان وبتسأل العالم بالشوارع ما حدا مهتم ولا هامه في رئيس او ما في، في حكومة او ما في، في بلد او ما في.. شعب مخدر راكض ورا الدولار والدولار راكض قدامه.

على فكرة في اجتماع دولي خماسي للنقاش بأمورنا، اميركي فرنسي سعودي قطري مصري، بس الاجتماع ما لاحظ وجود الايراني على الطاولة، يعني هلق اذا كل اهل المخطوف اجتمعوا وقالوا بدنا نرده والخاطف مش عالسمع كيف بدهم يردوه؟ كيف يعني عم تتناقشوا عن الرهينة بغياب الخاطف؟ على كل حال ما هو كله هالاجتماع ما مكلف شي، يعني ايام ما كانت الاجتماعات تكلف تيكيت طيارة وحبر لكتابة البيانات ما كانت تقدم أو تأخر.. كيف هلق صارت على زووم وماكسيموم بينبعت البيان ديجيتال ما حدا مضطر يطبعه؟ وهيدا تحدي للمرشد الاعلى ما بيقدر يطلع يقلنا بلوا القرارات واشربوا ميتها. بس السفير الايراني خلال احياؤه الذكرى ال ٤٤ لقيام الجمهورية الاسلامية بايران قال من بعلبك انه هيدي المرحلة اللي عايشين فيها غيمة سودا ورح تقطع.

وكمان المفتي قبلان دعانا للمشي وراء الثنائي الوطني والصوت الإنقاذي للرئيس بري؛ لأنّ اذا ما توافقنا ع رئيس منكون عم ننحر لبنان.

اي انتو مستقلين مثلا يصير في انتخابات لرئيس جمهورية؟ انتخابات عادية يعني لا وافقني ولا وافقك ولا تعى نطبخها سوا ونوزع حصص؟ اكيد فيها نحر للبنان هلق هيدي نحر لبنان على ما يبدو عبارة المرحلة عند حركة المحرومين او عند بيت قبلان بالقليلة لان كمان النائب قبلان قبلان حذر من نحر لبنان اللي هو مستهدف من الخارج

على الهامش، التيار الوطني الحر اطلق حملة اسمها #لوحدنا، ومن الاقوال الخالدة فيها شي متل لوحدنا طرحنا ورقة اولويات رئاسية...

#لوحدنا تيار فيه هلقدّ مساحة حرية وديمقراطية .. بس اهم وحدة #لوحدنا عم نحاول نحكي مع الكل..

يعني كل اللي فوق مرقوا معي بس لوحدكم عم تحكوا مع الكل؟ ما انتو حلفائكم اللي حطوكم عالخريطة وحموكم آخر ١٥ سنة ما بقى قادرين يتحملوكم.. وبعدهم لهلق ضاربين خط الرجعة معكم يعني لو حدا غير ال او تي في قال عن السيد انه بطير فيولة كان طار البلد يعني لو حدا غير جمهور التيار قال انه الضاحية ما بتدفع كهربا كانوا اعتبروه عم يأبلس البيئة.. على كل حال بخلافكم مع حزب العزة والكرامة لا يسعنا الا القول اضرب الظالمين بالظالمين واخرجنا منهم سالمين

قبل ما اختم بزيارة بو صعب لواشنطن، اكتشفنا انه البنك الدولي مش قاطع من حده استجرار الطاقة ولا همته الكهربا، وهيدا اكتشفناه لان بكل بساطة كان في نواب من التغييرين من خارج الاستطفافات وخبي لي بخبي لك كانوا حاضرين النقاشات ونقلوا اللي صار بالاجتماعات، بس ما همنا نحن صار عم تجي الكهربا عنا كل ٤ ايام ساعة، صحيح هني قالوا ٤ ساعات كل يوم بس يمكن هيك فيه ديسليكسي شوي بالديليفيري تبع الوعود. الكهربا ما اجت بس هيدا ما رح يأثر على الفواتير اللي صارت على التسعيرة الجديدة ابتداءا من ١ شباط، تماما متل ما مشي دولار ال ١٥ الف الجمركي، وصيرفة عم تكبر وتجوهر وقريبا منشوفها بمرتبة ال ٥٠ الف وأعلى،

ان شاء الله موت اذا عم كذب بس البنك الدولى لسلامة الغذاء قال انه المواد الغذائية ارتفعت ١٤٣٪ وهيك صرنا تالتين بالعالم بعد زيمبابوي وفنزويلا بس متصدرين بالعالم العربي، انا بقول رح تتحسن ارقامنا لان وزير الاقتصاد قال بده يحمينا من التلاعب بالدولار على السلع الغذائية عبر تسعيرها بالدولار، وبلشوا بالسوبرماركت والمطاعم ومن لف لفهم بلشوا يطبقوا القرار قبل دخوله حي.. خليني ساكتة