بهمني اولا ان أشير إني بهيدي الحلقة محكمة العقل ومغلبة الحس الوطني نزولا عند رغبة وزير الاعلام لاننا بمرحلة حرجة من تاريخ الوطن تفترض بالجميع ضبط النفس والتروي، قبل إطلاق العنان للأحكام الجاهزة سلفا وللتكهنات وليدة الخيال.
من نوفمبر 2021 ل نوفمبر 2022 هيدي يعني من بعد ما صار عنا حكومة برئاسة نجيب ميقاتي، لما تلتبس عليكم الامور بظل الفراغات المتعددة
تضخم الأسعار في لبنان ارتفاعاً بنسبة 142 بالمئة
زادت الخدمات المتفرقة وخدمات التأمين 248 بالمئة
المياه والغاز والكهرباء والمحروقات المخصصة للبيوت، ارتفعت 234 بالمئة،
وزادت كلفة الاتصالات والانترنت اكتر من الـ 226 بالمئة.
أسعار المواد الغذائية والمشروبات غير الروحية، ارتفعت بنسبة 171 بالمئة وهيدي تحديدا صارت مرتفعة ٦٠٠٠ ٪ من ال ٢٠١٩
نسبة البطالة كمان ارتفعت لاكتر من ٣٠٪ يعني تلت اللبنانيين
هلق هيدي الارقام كلها عم تذكرها تقارير اقتصادية محلية وعالمية، بس ما انتبه لها نجيب ميقاتي التقرير الوحيد اللي لفت له نظره انه المسيحيين صاروا ١٩،٤٪
مش قليل كل شي عم بزيد بالبلد بس المسيحيين عم يقلوا، طب كتير منيح يعني بالقليلة ما تبقى من المسيحيين صاروا من الناجين، وهيدا بعتقد# une raison de plus للشعور اللبناني التاريخي ولو بدها تطلع شوي طائفية معليه انه اللبنانيين قسمين، قسم مسيحي وقسم بده يكون مسيحي.
بس نحن وطن التعايش المشترك والصليب اللي بتعانق الميدنة، بكل شي حتى بتقاسم الحصص وتوزيع المناصب والثروات، هلق كبار القوم من سياسيين ومصرفيين وحاشيتهم وعيلهم بيتقاسموا الثروات على اختلاف طوائفهم ومذاهبهم، وعامة الشعب الكادح من كافة الطوائف والمذاهب ايضا بيتقاسموا كدش الأرض وموت اولادهم على ابواب المستشفيات وضياع مستقبلهم.
هلق صحيح انه ميقاتي بده يدغدغ مشاعر باسيل ويخبروا قديه الاسلام اكتر من المسيحيين، بس للأمانة انا انشغل بالي على ميقاتي مثلا يقرر يطلع محمد رعد على سبيل المثال لا الحصر ويدغدغ له مشاعره ويخبروا قديه صارت نسبة الشيعة بالبلد، وما ادراكم اذا قرروا الشيعة العد. وطبيعي نحن التعايش المشترك عنا بلبنان ينحسب افقيا وعموديا، يعني بين المذاهب ضد بعضها، وبين ابناء المذهب الواحد، خدوا مثلا السنة والشيعة الحب واصل للركب، ومن بعد ما قطعنا قطوع جريمة عكار بقتل الشيخ الرفاعي، واصل علينا #مسلسل_معاوية قريبا برمضان.خلونا بالداخل ما بقي حدا ما شكر الاجهزة الامنية على درء الفتنة بجريمة #الشيخ_الرفاعي، وانا كمان بشكر الاجهزة الامنية على تفانيها بكشف الجرائم، وبضم صوتي لصوت وزير الاعلام بضرورة التحلي بالعقل وعدم اطلاق العنان للأحكام، وبختصر لكم القصة بكلمتين، القاتل دايما دايما معروف بالجرايم الفردية بياخد الاجهزة الامنية ايام معدودة لتجيب القاتل، أما الجرائم اللي الاجهزة الامنية ولا مرة قدرت تربط خيط بخيط فيها واهمها الاغتيالات السياسية فكمان القاتل فيها معروف، واذا ساقبت انه مش هو اللي قتل الشيخ الرفاعي مش يعني بريء من الجرائم التانية.
انه الامن مكموش لدرجة تم توقيف اللي اطلقوا النار على #تلفزيون_الجديد، خلونا نرجع للشأن السياسي الاقتصادي القضائي المضروب ببعضه البعض، غادة عون مستمرة بهمجتها عالمصارف و #رياض_سلامة، #نجيب_ميقاتي طلب من مولوي يطنشها والمصارف وقفت الاضراب عربون حسن نية، باسيل اعتبر قرار ميقاتي تدحل بالقضاء مرفوض.. اذا منرجع حاولي الشهر لورا كان قرار #غسان_عويدات كتير منطقي بالنسبة لباسيل بتطنيش طارق البيطار لانه ادى للافراج عن بدري ضاهر وغيره.. باختصار حتى بموضوع القضاء والتدخل بالقضاء والقضاء على القضاء اللعبة ٦ و٦ مكرر، كل قضية كبيرة من جريمة المرفأ لجريمة نهب الاموال بعطلها فريق سياسي معين، وبيبقى كل واحد بطل قومي بنظر جمهوره بقضية معينة، والنتيجة غطي عليي بغطي عليك ومنسب بعض بالاعلام. بعده المفتي قبلان عم يحذر من السفارات اللي عم تلعب دور ابليس، وعم تعطل انتخاب رئيس، وعم تعطل بناء بلد، وعم تعطل تحقيق المرفأ.. يعني يا شيخنا هو اذا ابليس بيتعرف على هالطبقة اللي حاكمة البلد بقدم استقالته لانه لقي اللي أبلس منه.
قبل ما اختم آلان عون قال انه التيار الوطني الحر متواجد في المنتصف "نحنا والإعتدال السني والتغييريين" ولا يمكن للطرفين الآخرين أن يجمعا حيثية لمرشحين لا يملكونها”، بعتقد بأسرع وقت ممكن لازم ينتبهوا التغييرين ويشوفوا حالهم شو بدهم يعملوا إذا بالاخر طلعوا عم يقربوا هلق من تيار الافقار والتعتير. على سيرة النواب التغييرين #نجاة_عون و #ملحم_خلف بعدهم معتصمين بالبرلمان عم يطالبوا بتطبيق الدستور وانتخاب رئيس جمهورية، الملف بالموضوع انه الرئيس بري على ما يبدو حردان، حردان لدرجة بعد ما اطلق ولا نكتة على الموضوع، ومقهور لدرجة ع يحاول يعاملهم كإنهم معتقلين عنده. وجنجويده على مداخل المجلس بقرروا مين بحق له يزورهم ومين لا، واي متى بفوتوا لهم اكل واي متى لا. ما هو على فكرة الطبع بيغلب التطبع، والكرافاتات والمناصب ما بتمحي الممارسات الميليشياوية قد ما مرق العمر.
ان شاء الله موت اذا عم كذب رجع صار في باسبورات وهيك بكون اللواء #عباس_ابراهيم وفي بوعده قبل ما تخلص مدته بالامن العام، ما بعرف ليه عندي شعور مش اتهام وعنان للاحكام الجاهزة احسن ما يزعل مني وزير الاعلام، عندي شعور انه هو الاستيذ نبيه ما بده يلاقي حل للتمديد او التجديد.. لإن أي احتمال آخر بقول انه بري عاجز عن ابتكار الحلول الخنفوشارية، وهيدا فقط لان بعد هالعمر طلع له بالقليلة نائبين عملوا له قلق دستوري، وصراحة ليه ليكذب الواحد اذا سيذكر التاريخ اننا عشنا وشفنا الرئيس بري ما عارف حاله شو بده يعمل… خليني ساكتة
