تحدي وجدل

خليني ساكتة -قال "أول" مطار بخدمة 5G! (الحلقة ١)

تم النشر في 21 أغسطس 2019


بلش العمل بالرسوم الإضافية على المسافرين من بطريق الجو على الرحلات التي تتعدى مسافتها 900 كلم كوجهة نهائية لدى مغادرتهم الاراضي اللبنانية رسم خروج قدره.

واهم المطارات التي تقع ضمن شعات 900 كلم على سبيل المثال لا الحصر هي: مطارات سوريا والاردن مطارات بغداد والنجف واربيل، في العراق، مطارات القاهرة، وشرم الشيخ، والاسكندرية في مصر.


هلق لان اجركم اخدة كتير ع إسطنبول هالايام، اي مطار إسطنبول مش من هيدي المطارات يعني حضروا حالكم

هلق اذا صار لكم زمان ما سافرتوا من المطار اللي بطور التوسيع، اللي بحده من الشمال ريحة المزرعة المجاورة ومن الجنوب ريحة مطمر الكوستابرافا


رح اعطيكم جولة هيك سريعة من الأمور اللي بتصادفكم، هلق بكل مطارات العالم انت بتفوت بتسلم شنطتك عند شركة الطيران المسافر معها، وبتتوجه لإتمام معاملات السيكيورتي... نحن عنا بلبنان في سكانر لازم تقطع فيها الشنط قبل ما تفوت عند شركات الطيران، هيدي تحديدا محل ما وقف ابن المير بالصف


وهلق لأسباب أمنية جديدة صار ممنوع عليك تفوت الترولي يعني بتحط الشنطة وبتلحقها بس بدك يمكن تحملها على ضهرك او تجرها انت حر يعني دبر رأسك، هلق اذا توفقت بعامل يساعدك اكيد رح تندم حياتك خاصة اذا مسافر الصبح بكير وأنت مش واعي لانك رح تضطر تسمع مم واخد بعيلته عنده سرطان واخبار أولاده اللي مش مسجلين بالمدرسة وقصص فقر الحال، اللي انت عبالك تتعاطف معها بس قد ما صارت كتيرة بالبلد صارت هي القاعدة وأنت كمواطن وموظف عادي وشركتك دافعة حق التيكت لتسافر الأرجح بتصير تتطلع فيه وعبالك تخبره كم شهر صار لك مش قابض بس خايف تصدمه

هلق كله مش مهم قدام ان شاء الله موت اذا شي مرة قطعت للميلة التاني من السكانر ولقيت الشاب اللي قاعد عم يطلع بالشاشة ليشوف اذا في شي بالشنط

يا خيي ريحونا وارتاحوا


منوصل على الأمن العام عالشمال للبنانيين واليمين للأجانب عرفتوا وين محل ما علقت نانسي عجرم هي وحاملة ابنتها هون للأمانة الشباب والصبايا سريعين ورشقين وضحوكين


بتفوت بتتجول بالديوتي فري يعني هي عبارة هيك عن كم محل هي الشي الوحيد غير المضخم هيك بتحسها على حجم البلد. الشعب مشغول بفواتير كافي ماتيك وكأنها صارت أهم من الشيك ان عالمطار انه شوفوني شربت فنجان قهوة ودفعت كتير وهلق قررت نق عليكم

هلق قبل كافي ماتيك عندك تاني سكانر، هون دايما بترن وبتتفتش وبتقطع مش قصة

بس للصراحة برحلتي الأخيرة من يومين لفتني اكتر شي شغلتين تحديدا انا وعلى الـ gate يعني تقريبا باب الطيارة

Announcement

عن مكان خاص للتعامل مع الأشخاص المصابين بمرض التوحد بمطار رفيق الحريري الدولي نساني لثواني الروائح العابقة من الخارج وحسسني أني واااو عم نفكر بالإنسان كإنسان

انا الشغلة التانية فكانت الشاب اللي واقف بعد الغايت تحديدا حد شاب الأمن العام اللي بيتأكد انه باسبورك مختوم كإن مش واثق بالشباب محل ما نانسي عجرم نطرت انه ما حدا بيقطع اذا ما ختم الباسبور، هيدا الشاب اللي قبل شي ١٠ فشخات من باب الطيارة كل شغلته يمد ايده وياخد الهاني باغ ويتمنالك توصل بالسلامة شي ٢٩ مرة لتحس عدمك وتمد أيدك على جيبتك وبتصير انت عم تقول يا رب أوصل على مقعد هالطيارة قبل ما اضطر مد أيدي على جيبتي بعد مرة


هلق خلينا بالدفعة الأولى المستجدة الرسوم على المسافرين لاكتر من ٩٠٠ كلم يعني حتى نحن ورايحين نتنفس برات وطن النجوم بدنا ندفع

- 50000 ل.ل بالدرجة السياحية

- 110000 ل.ل بدرجة رجال الاعمال.

- 150000 ل.ل بالدرجة الاولى.

- 300000 ل.ل على كل مسافر على متن طائرة خاصة.

انا شخصيا اذا بتجيني هجرة دايمة على شي بلد ندر عليي لأدفع تعرفة السفر على الطيارة الخاصة