تحدي وجدل

خليني ساكتة - الليرة بخير (الحلقة ٢)

تم النشر في 17 سبتمبر 2019


بـ٢أيلول اعلنت حالة الطوارئ الاقتصادية بلبنان، هلق نحن قبل هيدا التاريخ ما كان معنا خبر انه الاقتصاد واقف على سوسة ونقطة

لان اصلا نحن ما منفتح مجال للواقع يسيطر علينا، يعني قاعدين بلا شغل، البطالة ضربت بـ٣٨٪؜، المؤسسات بتقبض موظفينها شهر اي ٣ لأ، الدولار مفقود من السوق، التجار ما بيقبضوا الا بالدولار، المؤسسات عم تصرف الدولار على ذوقها شي بـ١٥٢٥، شي بـ١٥٤٠، وصولا للـ١٥٦٠ كله هيدا بالنسبة النا نحن كشعب شائعات، يعني لو صارت معنا ما منصدّق عيونا

لان نحن اصلا معميين، معميين بثقتنا العمياء بزعمائنا وحكامنا ورؤوسائنا، حدا بيحمل هم وفي مين شايل الحمل عن اكتافه

حاكم مصرف لبنان قال لي وأكد لي، انا كمواطن يعني ، انه الليرة بخير، انه شو بكذبه؟ مش عيب؟مش هو اكبر مني وافهم مني؟

كيف بدكم ما أوثق فيه وأمشي ورا واقع بقول أني انا وعم اشتري أغراض حسبوا لي الدولار ب١٥٢٥؟

نحن لقبل ٢ أيلول، تاريخ اعلان حالة الطوارئ الاقتصادية، كنا مصدقين انه البلد بألف خير لحد ما قال الرئيس سعد الحريري

"إذا أحد ما ظن أن الوضع الإقتصادي بخير يكون مخطىء" هو انا شخصيا دغري صدقت انه معقول انا يعني كون بعرف اكتر منه او بفهم اكتر منه بهالموضوع؟

واللي قطع الشك باليقين انه الدكتور جعجع قرر بنفس اليوم البدء بمكافحة الفساد تحول هيك بقدرة قادر يوم الاثنين ٢ أيلول ليوم مجيد...

آه هيدي الصفة مش مرتبطة بالاقتصاد؟..

معليه مرقوا لي إياها لان ان شاء الله موت اذا هول رح يبلشوا بحالة الطوارئ او هوليك بمكافحة الفساد او التالتين بفتح الملفات

والدليل إقرار خطة ماكينزي اللي أجت سيرتها اكتر من مرة بالمقرارات الصادرة عن طاولة الحوار، هي ذاتها هاي الخطة اللي بعيدة عن ماكينزي متل هون ماكينزي، بس بعدنا مصرين انها خطة ماكينزي.

يا حرام أخدوا منكم مليونين دولار ليدرسوا لكم الوضع الاقتصادي، وأنتم تكلفتوا وقت وسلامات من ورا قلبكم وتملق لبعضكم لتناقشوا خبرية انا رح لخلصلكم إياها ببلاش

اولا منختار عينة

عشوائية تتألف مني (بصفة افتراضية وليس شخصية) ومن ٦ أشخاص اخرين.. الحالة ببساطة هي التالية:

أنت بدك مني مصاري، وهو بده منك مصاري، والرابع بده منه مصاري، والخامس بده من الرابع مصاري، والسادس بده مِن الخامس مصاري، والسابع بده من السادس مصاري،...

هلق لو افترضنا انه العاشر دفع لي مصرياتي عالوقت، كنت انا دفعت لك عالوقت، وانت دفعت له، وهو دفع للرابع، والرابع دفع للخامس، والخامس دفع للسادس، والسادس دفع للسابع...

"طب في شي حدا يديني شي٢٠٠الف$ وبردله اياهم بالمحاكم"???؟!