تحدي وجدل

امتحان العودة الى المدرسة للبنانيين "الشاطرين فقط"! - خليني ساكتة (٥)

تم النشر في 6 أكتوبر 2019


بتبلش عبقة الأهل ما هي العودة عالمدرسة يعني اقساط مدرسية، اللي صارت بحسب اهضم نكتة عالسوشيل ميديا افعل دوا منع حمل حالياً

نا المدرسة بدها كتب والكتب بدها شنطة والشرطة بدها مقلمة والمقامة بدها اقلام... والعين بصيرة والأيد قصيرة، كيف بدك تقنع الخي الصغير يأخذ شنطة الخي الكبير؟!

مش مشكل بتتدبر، هلق بعيدا من النق الاقتصادي المشروع

في حدا يخبرني ليه طفل عمره ٨ سنين بده يكون عنده 16 كتاب، يعني وزارة التربية والقييمين على وضع المناهج المدرسية تحديدا بشو بكونوا عم بفكروا بس يقرروا انه هيدا الطفل بده يدرس كل هول الكتب بخلال العام الدراسي؟

-بعدين كتاب تربية وطنية؟؟ هو بفهم منكم انه نحن مسلمين جدل انه في وطن وبالتالي عم نعلم تربيته؟ طب انا عندي سؤال مش بالتربية الوطنية بيتعلم الطفل الحفاظ على البيئة والعيش المشترك واحترام الاخر؟ طيب ما هالولد عم يشوف أمه بالسيارة عم تتبهدل لان وقفت عالاشارة الحمرا، وعم يتربى بظل حكومة بتدفع ٣٠٠ مليون دولار حق محرقة تتنافى مع كل شي خصه بالبيئة...

- لا قال وشو؟ كتاب تاريخ طب يللا هيت لنسأل هالسؤالين بشير الجميل وطني او عميل؟ عدد دول الاحتلال التي توالت على لبنان؟ على يد من اغتيل رئيس حكومة لبنان رفيق الحريري عام ٢٠٠٥؟ (اه نسينا كتب تاريخ لبنان وقفوا على ايّام فخر الدين ومسرحية الاستقلال اخر شي اتفقوا عليه اللبنانيين)، هلق مثلا حادثة قبرشمون الأخيرة بتنذكر بكرا بتحديثات كتب التاريخ؟

- لحظة لحظة كمان في كتاب جغرافيا، السؤال للشاطرين بس: مزارع شبعا سورية او لبنانية؟ ماذا يُحد لبنان من الجنوب؟ كم تبلغ مساحة لبنان؟

والمصيبة الأكبر كل سنة رح يدرسوا هالاولاد عن هجرة الادمغة بيكبر الولد ما بده يكون سيّء بحق بلده وبده يخلي دماغه هون، بلاقي حاله خريج عاطل عن العمل، او تحت بند اشتغل وما تقبض يا حبوب!

بالعودة لوزن الشنطةالهائل على حجم الولد، في بعض المدارس مشكورة صارت بتاخد من الولد كل الكتب اول يوم مدرسة وبتبعت معه اخر النهار ورقة وحدة... ورقة القسط ؛)