تحدي وجدل

لبنان يحترق... خليني ساكتة (٧)

تم النشر في 16 أكتوبر 2019


تجرفنا؟ مين نحن يعني؟ الشعب الرتش؟ اواللي ممنوع نسمعكم صوتنا؟

كنت عم تحكي معاليك عن اللي بدهم يخربوا، وعن اللي عم يتحركوا

ما بقى عم نفهم معاليك يعني بكل صراحة انا صار عمري كتير واهلي مش معيطين عليي بكل هالسنين قد ما انتو بالتيار معيطين علينا كمواطنين هالاسبوعين،

معاليك والله نحن ما خصنا بزيارتك على نيويورك وواشنطن ومين استقبلك ومين لأ، لتطلع فشت الخلق فينا النا

يعني حتى صديقك “MY SAAD” حاول يحكي باسمك هونيك وما طلع بإيده شي

معاليك هالمي دخلك اللي بتجرفنا نحن وع حفة النهر ممكن تساهم بتطفاية الحرايق اللي ولعت البلد كله؟

كله؟

لا لا مش كله

العمى بقلبها هالنار شو طائفية مش معقول يعني ابدا ابدا حتى النار طائفية بهالبلد

والدليل انه اللي طفوها اسلام ودروزومسيحيين وسوريين وفلسطينيين كله هيدا لوئدها

قصدي للطائفية اللي عادة بتسبب فتنة هيدي الفتنة هي ذاتها اللي منرجع نلعن من أيقظها بعد ما يوقع كم قتيل

للأمانة انتو الحكومة الحالية ما خصكم بالطوافات اللي تم شرائها قبلكم، لأن كل حكومة بتفتح دكانة ع حسابها هيك بدول المؤسسات والقوانين ما في متابعة لشي ومين سائل عن ١٤ مليون دولار اندفعت لطوافات ما قادرة تطير لكلفة صيانتها الغالية، يا خيي ما قادرين نعملها صيانة هيت نتبرع فيها لقبرص او اليونان او الاردن ما هيك هيك اذا صار عنا حريق هني بدهم يجوا يطفوا يمكن يستخدموهم قطع غيار بس اكيد بيبقى افضل مما ياخدوا محل بباركينغ المطار؟؟

تقبروا قلبي واحد واحد بالحكومة قديش حريصين علينا، يعني حتى الوزير جريصاتي اللي عم يحاول ينقل لنا على level تاني من التحضر عبر الفرز وفرض رسوم على كيس النيلون، ما عمل متل ما بيعملوا ببلاد التحضر بهيك مواقف

عادة بيعملوا وحدة من اتنين او بيستقيلوا

او بيتضامنوا مع شعبهم بكل تواضع وبيتسامحوا من الشعب

فيك مثلا معاليك تشرح له بصفتك الكبير فيهن، كرئيس تيار وكتلة وبعد اجتماع الـ٧ ساعات مبينة حتى الرئاسة قربت

فيك تشرح له ان اذا بيطلع بقول الحادث مفتعل وبطالب باعدام الفاعل وبعدين بيطلع زميله “المعليش يعني شوي طائفي” بقول انه بس الحرايق عم بتطال القرى المسيحية انه هيدا الحكي كتير شعبوي وما بنصرف بمحل بالسياسة.. يعني حتى لو في شكوك حقيقية بالكوارث الطبيعية حققوا وبعدين خبرونا نتيجة التحقيق، لان والله انا شخصيا مشتبهة بمؤامرة اميركية صهيونية ادت الى ما ادت اليه هيدي الرياح الخمسينية الساخنة مش مسنتضفتها ابدا لمحتها مرة ورا ترامب بالككادر هو وعم يحكي بباحة البيت الابيض

لو كنت عارفة انك رح تلتقي السيد كنت خبرتك، ان شاء الله موت اذا عم كذب، بس اللقاء اجا مفاجأة كمان اللقاء بسليمان بك

لقاء ٧ ساعات والتاني ٦ ساعات كنت خلصت آخر season من game of thrones انا

هلق اكيد الاجتماع كان كتير قوي بعتقد باول ساعة طلعت فكرة جرفنا طب ليه ما بتحطونا بالجو كيف؟ لنعرف مستقبلنا يعني

وخبرونا بالاخبار انكم ناقشتوا بمصلحة مين بصب سقوط البلد يمكن هيدي كمان ساعة مع ان البلد بخير

انا بقول هالمصارف تقلوها عليكم من هيك طول الاجتماع مش عارفين يعني كيف تحديدا بدكم تجرفونا بس بالوقت نفسه تخبرونا انه بعد في هالقطاع قلتو هيت لنجرفه معكم

انا بقول انه ناقشتوا كل اضراب لحال والا شو بدكم تحكوا كل هالوقت

المهم هلق خلصت الاجتماعات بالسلامة، والحرايق تطفت باللحم الحي، بقل لك شي معاليك “هيدي تسريبة” ما تقولها لحدا حتى تكونوا انتم السباقين فيها وما يسبق كم عليها ولا حزب او تيار تاني… موسم الشتي بلش كم يوم وبتطوف البلد من هلق عمم عالشباب كم ردية ليعطوا فيها علينا

وانا بوعدك شو ما قلته سبب الفياضانات رح صدقوا… بانتظار موسم الغريق بعد الحريق خليني ساكتة