Politics

الورقة الاصلاحية وشرح "كلن يعني كلن"... خليني ساكتة (٩)

تم النشر في 23 أكتوبر 2019



عن جد هلق

عندي سؤال رح يخنقني من أول ما خلصت حكي جنابك انه كيف يعني كل هالاصلاحات ما كنتو قادرين تقترحوها او تقروها كل هالعمر بس زبطت معكم بـ ٧٢ ساعة؟

شيخ سعد بدي قل لك شي هيدي المقررات هي يعني من البديهيات لأي حكومة بتحترم حالها لازم تقدمها لشعبها هيك ع صحة السلامة يعني بلا حراك بلا ثورة بلا تظاهرات يعني انا هلق ابنتي لازم تقوم كل يوم تحرق دواليب لطعميها وأخذها عالمدرسة وحممها؟

هيدا اللي عم تحكي في يعتبر الحد الادنى لعمل الحكومات الطبيعية اللي بتدير عادة امور شعبها

تجميد الانفاق الاستثماري غير الضروري

انه هيدي كان بدها ينزل بلد بامه وبيه لتصير بلد تحت دين عام بيتجاوز ٨٠ مليار دولار بس بده تظاهرات مليونية لتنتبهوا لضرورة تجميد الانفاق الاستثماري غير الضروري ؟؟ وبكرا بتطلعوها برأس البنى التحتية اللي هي اصلا معدومة

إلغاء ودمج بعض الوزارات والمؤسسات والمرافق العامة؟ مثلا ما انتبهتوا انكم ٣٠ وزير مبهبطين شوي كتير على الوطن؟ خصوصا انكم وصلتوه عالارض يا حكم

بعدين اسم الله وزير تربية وواحد للثقافة والله بلد بحاجة لثقافة وتربية هول الوزيرين بالذات لا وشو اذا بصير في تكسير بالتظاهرات بتقولوا عنّا زعران اذا منغني ومنرقص بتقولوا فلتانين بشرفكم ما اذا انتو وزرا التربية والثقافة عنّا؟

قال وافقته على الغاء وزارة الاعلام؟

ضيعانه والله جمال الجراح بدنا نشتاق خصوصا نحن الصحافيين للقرارات المصيرية اللي كان مغرقنا

بعتقد هلق في اعلام غربي عم يفتش شو يعني وزارة اعلام وليه عادة بتكون موجودة

تفعيل إدارة ومردود عقارات الدولة؟؟؟

هيدي بتشمل العقارات اللي مستأجرتها الدولة بألوف الدولارات لسنين وما بتستعمها او شي تاني؟

الإسراع بتنفيذ برنامج الانفاق الاستثماري (سيدر)

مش مهم انتو تسرعوا مهم هني يوافقوا مش هني عندهم نفس طلبات الشارع بالارض؟

تقشف، وقف الهدر، وقف الفساد وزيادة عليهم الخصخصة

بس انتو اكيد بس رح تروحوا على موضوع الخصخصة وبيع مؤسسات الدولة لان وقف الهدر والفساد عزيز ع قلبكم

بس صراحة بالورقة حبيت الاسراع بإطلاق المشاريع الاستثمارية... انتبهوا دخيلكم ما تتهوروا بالعجلة الندامة

إطلاق مشاريع أليسار ولينور

هول هني ذاتهم تبع ١٩٩٢ وال ١٩٩٧ صح؟ او انا غلطانة؟ سبحان الله شو بتعمل عجائب هال ٧٢ ساعة آه صح هول الشركات الاستشارية المتخصصة محلية واجنبية اللي بدكن تستعينوا فيها رح تحدثهم او بدكن تمشوا ع مخططات انحطت من حوال ربع قرن؟ هول الشركات اللي متل ماكينزي اللي طربشتونا إياها صح؟

كمان لمحت بالورقة شي خصه المؤسسة العامة للزيتون وزيت الزيتون بس ضيعانها والله غاب عنها الشمندر السكري ومصلحة السكة الحديد

انا اكيد ما رح اقدر اقطع عالارقام والبنود كلها لان بصير بدي تلفزيون مش فيديو، بس بدي قل لك يا شيخ سعد اكتر شي لفتني التوجه وتكليف مهمات لللسادة وزراء الدولة ٧ وزراء دولة لكمالة العدد هول معقول تتخلوا عنهم؟ بيختل ميزان القوى بالبلد فأوكلتوا بعضهم مهام لتبين أهميتهن

وكان لافت على فكرة دعم القروض السكنية والاسر الاكثر فقرا هيك بدي اياكم تحسوا مع الشعب الفقير

وان شاء الله موت اذا عم كذب بس كانت رح تنزل دمعتي لما قررتوا تخفضوا معاشاتكم ٥٠٪

بس اهم شي استعادة الاموال المنهوبة والاستراتيجية الوطنية لمكافحة الفساد هول هيك كيف بدي قل لك OUTSTANDING صرت اتخايل المشهد انه قال بينفصل كل واحد فيكم لشخص وضمير متل سكروج بأفلام كريسماس اللي عم يحاسبه ومنشوفكم رايحين واحد ورا واحد عم تقدموا جردة وتسلموا ممتلكات وأموال... يا حبيبي مين بده يكافح شو؟ ومين بده يستعيد؟

قبل ما انهي فيكم تتهمونا بتهمة غير انه عم نقبض من السفارات؟ لان لما واحد على payroll تبع ايران والتاني تبع السعودية والتالي عند دول أوروبية والرابع عند اميركية يعني بكون عيب تتهمونا النا اننا عم نقبض من سفارات حتى لو صح هيدا الحكي منكون عم تقلدكم صح؟ لا مش صح لان نحن مش متلكم واهية عم نصرخ كلن يعني كلكن

آه عندي سؤال القوات اللبنانية والحزب الاشتراكي ووليد بيك اي جزء من كلن يعني كلن مش فاهمينه؟ لأن هيك كتير مرتاحين على وضعكم حاستكم ومش منتبهين انه العالم بالشارع عم توجه الحكي الكن وانه اذا استقلتوا او تحفظتوا بطلتوا جزء من المنظومة السياسية؟

وآخر شي شو بخصوص فؤاد السنيورة... يا حبيبي عن جد؟ seriously يعني عم تطلع عالتلفزيونات تنتقد الورقة الاصلاحية وبإنه محطوطة بس لسنة وحدة وما الها افق مستقبلي في تطل معي من بلكون بيتك شوي اذا بتريد؟

سمعت؟ اي خليني ساكتة