Politics

منظومة بتخاف من بوسطة! خليني ساكتة (١٤)

تم النشر في 18 نوفمبر 2019



البوسطة شو كانت عم تفكر؟ معقول يعني من كل عقلكن

تقطعوا لبنان من شماله لجنوبه بلا laissez passer؟

ما تكونوا مفكرين الدنيا فالتانة هيك؟ يا حرام عليكم

اذا فكرتوا انه هالكم مية الف واحد اللي بالساحات راح يعطوكم شرعية انكم تسرحوا تمرحوا بالبلد على ذوقكم لاااااا حبيباتي

كل منطقة الها خصوصية كل واحد يقعد بمنطقته وهالاختلاط ما بدي اياه

هيدا اختلاط ما بيجي من وراه الا وجع الراس الله بوفقكم كل واحد يلتزم منطقته وينضب تحت عباية طايفته

بعد ناقصنا وحدة وطنية وعناقيد ومواعيد

هلق عن جد طلعت ممولة من الاميركين؟ بقديه؟ بـ ٥٠٠$ كاملين؟ ؟

بعدين يعني هلق محرزة الشحادة؟ انه شو راحوا من هون ع آخر الدنيا يتمولوا ببنزين للبوسطة؟ قديه كلفتهم؟؟؟ ايه ايه؟ كم تنكة بنزين؟ ٣/ ٤ / ٥؟؟؟ معكن حق كان لازم ينطروا الانتخابات كانتوا وزعتوها عليهم انتو معكن حق “بونات بلادكم ولا بنزينات الصليبي

انا اليوم مقررة ما بدي سميهن ولا بدي حط صورهم كلن يعني كلن

متل ما هني بعدهن لهلق بعدهم عم يحاولوا يطنشونا قال هني ما عم يفهموا علينا انا بدي طنشهن كلن يعني كلن


انا اليوم بدي وضح للعالم اللي متلي وبلش يضيق خلقهم من الاتهامات بانهم متآمرين وعملاء وانه قال ما رح يستوا اللي بالحراك الا ليصير في حرب ودم بالشارع او مش اللي متلي اللي ضدنا مع الحراك او الانتفاضة او الثورة متل ما منطمح انها تكون

انا بدي لشريحة كتير كبيرة من العالم اللي ملاقية انه نحن معنا حق ولكن … اولها انه لا نحن مش عملاء ولا عم نفذ اجندات خارجية


نحن شو النا علاقة اذا مطالبنا بتنطبق على الحياة بفرنسا او الدنمارك او المانيا او اميركا

يييي اميركا هيدي هي اللي عم تتهمونا بالتعامل معها

شو بدكم نعمل ما نطالب بالمي والكهربا والبيئة والشوارع والبنى التحتية والاقتصادية، لان في منن بأميركا؟

انه نعيش ببلد في ادنى مقومات العيش الكريم ؟ حتى ما تتهمونا بالعمالة؟

بدكم نقبل بالسرقة والفساد وكم الافواه لان في حرية ومحاسبة بأميركا؟


بدكم نقبل انه مستقبل اولادنا يتدمر قدام عيوننا نعيش عم نشتغل ليل نهار وبالكاد نلحق ندفع قسط المدرسة لما نتهم بالعمالة؟

بدكم اولادنا تموت ع ابواب المستشفيات وباخطاء اطباء وبأدوية خالصة مدتها واخر شي نركض فيهم لنحكمهم بأميركا؟

طب شو منعمل اذا اقل حقوق الانسان موجودة بالبلاد اللي عم تتهمونا بالعمالة الها؟


لاااا انا مش عملية لإن طموحي انه ابنتي تعيش ببلد اذا تظاهرت فيه او اعتقلت ما تنضرب ويتكسروا اضلاعها لحد ما تقول انه زعيم من الزعما تاج راسها وتكون خريجة جامعة دافعة دمقلبي عليها لحد ما يجي جهاز امني يهينها ويعزبها لتقول انه هي حمارة

صارلكم عايشين ومعيشينا ٣٠ سنة خيفانين من انها تتكرر الحرب الاهلية، وكل ما طلع حدا وقال لأ بتركضوا دخيلك ما تفتح تمك بيقتلوك؟

اللي بيقتولنا هني اللي قتلوا اللي قبلنا بالحرب، وهني اللي قتلوا من كم يوم علاء ابو فخر، هني ذاتهم بيقتلوا القتيل وبيمشوا بجنازته… او غريمهم بيقتل القتيل وهني بيركضوا لحقن الدماء… ما بهم القصة اكبر من واحد يموت القصة بمين القاتل وليه القاتل حس حاله انه قادر يقتل لانه ببساطة مستزلم وعارف انه في ضهر حاميه وعارف انه كل الامور بتصير بهيدا البلد ٦و٦ مكرر وby elimination انت بتخصم لي جريمة من هون وانا بخصم لك جريمة من هونيك

انت بتمرق لي سرقة من هون وانا بمرق لك سرقة من هونيك

انت تمرق لي سلاح من هون وانا بمرق لك وزارة من هونيك

انت بتمرق لي فساد من هون وانا بمرق لك نائب من هونيك


اذا هيدي هي اذا نحن ما فينا نفوت ببوسطة “الفتنة” على ارضكم، ولا فينا ننتقد حدا منكم ولا فينا نطالب بحقوقنا بيناتكم... وانتو التانيين المعتبرين انه لازم نقبل بالخط السيء منالسياسيين الحاليين لنخلص من الأسوأ، انا بقل لكم المشكلة انه الخيار بهالحالة رح يكون بين الاسوأ والأكثر سوءا لان هالطبقة السياسية تخطت ليفيل السيء من زمان، لان سيئها بالحد الأدنى عنده تاريخ عظيم من عدم تقبل الآخر ومحاولة محوه عن الخريطة


خلص من هيك اعطونا قطعة ارض، بدنا محل "صغير"، نحن المجموعة الخانعة، الخسعة، الرومانسية الحالمة ببلد حقيقي العالم لتوزع فيه ورد ولتنشر أعلام بين الساحات متل جماعة فرح العطاء تبع نقيب المحامين الجديد اللي ربح مبارح بوجه كل مشاريعكم ومرشحينكم اعطونا جزء نعيش فيه نحن واولادنا، نربيهم ونعيش متل ما نحن بدنا

وخدوا انتم الجزء التاني، يا عمي اذا انتم اكتر خدوا الجزء الكبير واعطونا جزء قسم صغير نعيش فيه على قد طموحاتنا المحدودة المثالية متل ما بتوصفوها، هيك ارض نموت فيها سكتة قلبية، حادث سيارة، يا خيي بالسرطان بس مش اشلاء بحروبكم ولا فرق عملة من زعرانكم

ان شاء الله موت اذا عم كذب اذا انتم كتير حريصين على وحدة البلد وضد التقسيم، انفونا على شي بلد آخر، امنوا لنا محل آخر نعيش فيه، بما انه باسبورنا بقعر باسبورات العالم وبالكاد منقدر نوصل فيه من غرفة النوم على المطبخ بلا فيزا.…

مجلس النواب عم يجرب يجتمع ليصوتوا على عفو عام الشي الوحيد اللي بتمناه بحال انعقادها انها تكون جلسة علنية وبتصويت علني

لان العفو العام بالصدفة بيشمل التهرب الضريبي و جرايم التعذيب والتهويل وفرض الخوات والجرايم البيئية… وكمان بدهم يصوتوا على إنشاء محكمة خاصة بالجرايم المالية كرمالنا نحن لاننا عم نطالب باستعادة الأموال المنهوبة بس هي خاصة كرمالهم هني لتبقى القضية ومحاكمتها هيك اهلية بمحلية.. بس شوووو نحن بالاخر منطلع عملاء؟ خليني ساكتة