برامج كريسب

شعب "ابن شارع" من ٤٠ يوم... وما تربينا! خليني ساكتة (١٥)

تم النشر في 25 نوفمبر 2019


مش تفصيل انه الهجمة الكبرى تكون مرتبطة بشتيمة.

تحديدًا الشي اللي نبهكم منه السيد طب معقول يعني؟ واحد بيحكي كم لمصلحتكم، بتروحوا ما بتسمعوا الكلمة.

طب شو كان مطلوب من الشباب؟ يتركوا بيناتكم واحد عم يسب؟

هول الشباب عندهم مسؤولية اخلاقية، بيشلحوا فقرهم وقت الحاجة وبيجوا بكل عفوية لترباية المتظاهرين لمصلحتهم.

فجأة بحطوا حرمانهم على جنب، بتشعشع الكهربا، بتتدفق المي، بتتأمن الأشغال... وبتصير المشكلة الوحيدة عندهم انه في عالم بدها تقطع الطريق للمطالبة بتشكيل حكومة ومحاربة الفساد واسترجاع الأموال المنهوبة فبينزلوا بكل روح رياضية لفتح الطريق.

بالصدفة انه روح الزعيم رياضية اكتر من روح الشباب، لو هو قبلان هني ما بيقبلوا شو فهمنا؟ بدنا نفهمها من الآخر نحن المجموعة التانية، لان هني كمجموعة عندها مهمة ما بتقدر تتقاعس عن تنفيذها

انا صراحة مشغول بالي على السيد سامي خضرا، بدي اعرف شو رأيه باللي صار مبارح، على امل انه المشهد يكون رجع ستروا بعد ما عرته صورة المرأة بالتظاهرات، وعلى الهامش بدي قل لك يا سيد سامي لا لا يا سيد اللي عراكم مش صورة المرأة بالتظاهرات اللبنانية، اللي عراكم مقالة ام استغلت تظاهرة النبطية لترفع يافطة تسأل الناس اللي بيعرف ابنها يدلها عليه لانها ما بتعرف شكله بعد ١٠ سنين من حرمانها منه

اللي عراكم ومن زمان كتير قبل الحراك صور الامهات على ابواب المحكمة الجعفرية عم يطالبوا برفع سن الحضانة

وانت يا صبية عن جد كانت مسرحية هزلية؟

انا للصراحة شفت مسرحية هزلية اكتر منها كل يوم في ام بتضطر تنام واطفالها مش بحضها، شفت مسرحية هزلية اكتر لما فرض على ضحية اغتصاب انها تتزوج من مغتصبها، لما بتم تزويج قاصرات

بالعودة لموضوعنا ضرورة الشباب اللي هجموا مبارح يعرفوا انه الشخصية اللي بتخطب بمعدل مرتين في الاسبوع، وبتهاجم دول وتؤله أخرى.. تقرر الانخراط في حروب وتوافق على وفق إطلاق نار بأخرى.. قادرة انها تحرّك الشارع بكلمة، وأن تحتل البلد بإشارة.. هي شخصية سياسية بامتياز يجوز انتقادها... وقراراتها قابلة للنقاش لان اذا كانت صائبة للبعض ممكن تكون كارثية لشريحة أخرى..

بيبقى اكتر شي بحبوا فيكم وصايتكم علينا، نحن دايما مش عارفين مصلحتنا المسبات عيب ما بجوز الشتم بالتظاهرات (هلق اكيد شتيمة عن شتيمة بتفرق)

وكمان فهمانين انه التخويف من الحرب الاهلية كمان لمصلحتنا، بس ما تحملوا هم نحن عارفين حجمنا، ومنعرف انه ما في توازن قوى ليصير حرب في مجموعة بتقدر تقتل اذا قررت ومجموعة عم بتطالب تعيش بكرامة وببلد حقيقي رح تكون عرضة تنقتل اكتر من هيك ما في

التظاهرات مش منيحة لصيتنا مش منيحة لحياتنا

اصلا الحرية الزايدة مش منيحة لصحتنا

حتى اذا قناة تلفزيونية بتقول شي ما بيعجبكم الكم مش منيحة لأعصابنا، تخايلوا مثلا يا شباب انتو اللي نزلتوا مبارح تكونوا حاضرين حلقة ادوية السرطان المزورة، وهيك بسيناريو خيالي بدل ما تنزلوا تدافعوا عنهم نزلتوا تطالبوا بحق اولادهم واهلكم اللي ماتوا بسبب هيدي الادوية...

ان شاء الله موت اذا بفهم كيف بترضوا انتو تعملوا كل هيدا كرمالهم وهني آخر شي بطلعوا بيان انه ما خصهم فيكم، وفجأة بيرفعوا الغطا عنكم واذا انحشروا بسلموا كم واحد منكم للقوى الامنية، لتحقق انجاز بالقبض عليكم... آه نسيت انتم مش قصار تعديتوا على يافطة، فما مش مهم القبض عليكم...

بالآخر يا حبيبي مين ما كنت تكون ولأي حزب بتنتمي، وهون ضروري ارجع ذكر، بكلن يعني كلن، اذا زعيمك بدها تهز عرشه مسبة او هتاف او ازالة يافطة بتكون المشكلة بزعيمك مش باللي عم يتظاهر ضده! خليني ساكتة