خليني ساكتة (٢٦) موازنة “السبعة ودمتها”… امر واقع بـ ٤٩ صوتاً!

خليني ساكتة

تم النشر في 27 يناير 2020


مبروك الف مبروك الموازنة اقرت بأغلبية ٤٩ صوت ومعارضة ١٣

لتشوفوا انه المرحلة مرحلة شغل وما بقى في تضييع وقت الموازنة اللي كان لازم تاخد يومين مناقشة خلصت ب ٣ ساعات ونص

الموقف الابرز فيها لتيار المستقبل اللي عن جد اخد موقف تاريخي بعد مرة بعد ما كانت الجلسة طايرة حضر امن النصاب وما صوت قوي كتير قوي اقوى من العهد وجنبلاط الحريص على عدم الفراغ قام بعد مرة بالواجب شكلا ومضمونا

بس شو بدكم بالحكي الحريري متمثلا بكتلته قدر يحشر حسان دياب ويخليه يعترف على الملأ انه بيتبنى الموازنة هلق ما تنسوا تعاتبوا الحراك وتسألوهم ليه ما بسقطوا حكومة حسان دياب بالشارع

اذا بدنا نلخص الوضع بالبلد بكل جدية هو التالي:

حكومة جديدة مستقلة وتكنوقراط، حضرت مناقشة موازنة الحكومة المخلوعة من الشعب... هيك حضرت متل شاهد ما شفش حاجة او باللبناني متل الاطرش بالزفة

عن جد في شي اكبر مني ومنك عم بصير

وصلت لحرق صور االرئيس بري بأكتر من محل بلبنان؟

حتى بحرق الصور طلع بتشيل بري بيطلع لك بري مكانه

هلق مين ورا الموضوع؟ متل ما قلت لكم في شي اكبر مني ومنكم عم بصير

فجأة صار الintouchable من جريدة الاخبار لجميل السيد وصولا لمحمد عبيد

اكيد اللواء عارف حاله شو عم يقول بس يهدد احمد البعلبكي

ومحمد عبيد ما بده يلجأ للقانون لانه للضعاف بده مخابرات الجيش

بانتظار يطلع خطاب يرسم الخطوط الحمرا جوات الطائفة انا بقول هالحركات مش حلوة بحق ابو مصطفى بفجأة نسيته انه فني ٥١٪؜ من عمره بخدمتكم؟

اكيد اكيد بين اي واحد من هول والرئيس بري نحن مع اللعب الحلو

يمكن اصلا ما باقي لنا من امل الا انه الشبيبة الطيبة يلعبوا ضد بعض والبلد يطهر by elimination

هلق انا ما بعرف اذا بتكون الاجهزة بحرق بيت محمد عبيد اقوى بالقبض على الفاعلين من المطلوبين بسبب الاعتداء على المتظاهرين قدام مجلس الجنوب

هول اللي كل هالاجهزة ما قدروا يلاقوا منهم الا ٢، هلق في واحد صراحة كان صعب تحديد مكانه لانه خلف الجدار

حدا انتبه انه الجدار شي اساسي بحياة رئيس الحكومة الجديد حسان دياب، تسميته اجت مباشرة بعد اول جدار فاصل، وهلق جدار العزل اول اسرع انجاز بحكومته

هي هيدي الحكومة هيك يعني بتوحي لك بالجدار، جدار يفوت في البلد، جدار يضرب الشارع راسه فيه، جدار حجر، جدار فاصل بين السلطة والشعب..

ما تفهموا هيدا الجدار بالذات غلط لإن

الوزراء المعنيين من بعد ما قدموا السيفيات ووحدوا الطلب بإعطائهم فرصة حطوه لمنع الاحتكاك مع القوى الامنية

يعني انتو بحوا صوتكم برا واتركوا البلد لاربابها

اذا بدنا نلخص الوضع بالبلد بكل جدية هو التالي:

حكومة جديدة مستقلة وتكنوقراط، رايحة تناقش موازنة الحكومة المخلوعة من الشعب وتدافع عنها... تمثيل رئيس الحكومة لكل الحكومة كتير معبر رجل واحد يكفي ومعه حق الرئيس بري بس جاوب احد النواب وين الوزراء اللي بدنا نناقشهم لما قال ليش هني شو خصهم؟

والمجلس النيابي متجه بأغلبيته للتصويت على موازنة الحكومة المخلوعة بحضور الحكومة المعينة قبل ما تاخد الثقة

بس للصراحة هيد استعراض تيار المستقبل كتير قوي، اقوى من ال يموجي تبع ال شششش، انه تأخروا وبعد الsuspense حضروا امنوا نصاب الجلسة بعد ما كانت طايرة ما تنسوا هلق بعد شوي تعاتبوا الحراك ليه ما سقط حكومة حسان دياب بالشارع

ولكن جزء من اللي متوقع يصوتوا عالموازنة ما بدهم يمنحوا الثقة للحكومة، يعني بدهم يوافقوا على موازنة لتطبقها حكومة هني ما بيوثقوا فيها هلق الرجل الوحيد احتفظ بحقه بتقديم تعديلات

المهم هلق ابرز المواقف من الحكومة الجديدة، وزير المالية الجديد تبنى الموازنة، رجع بعت فذلكة جديدة، رجع نفى انه بعتها... ما يدفعنا الى تكرار سؤال الشيخ سامي شو في اشباح بالمجلس؟ انتبه ها ليكون في طابور خامس بالمجلس متل اللي كانت الاجهزة ما غيرها تنذكر وما تنعاد تستخدمه

وزير الداخلية ووزيرة العدل اكدوا على حماية المتظاهرين السلميين والوزير دعا الصحافيين لارتداء سترات لما ياكلوا اتلة

وسجل دخول حركة امل عالخطة الأمنية اللي طلبت من المتظاهرين ابلاغها المرة المقبلة بأي تحرك بمس بالمقامات لتحميهم على أمل ما تحميهم متل ما حميت قبضة الثورة بالنبطية والمتظاهرين بكفررمان وصور من قبل

وزير التربية الجديد متل جاستين ترودو اخر رواق ووزير الكهرباء هيئته كتير صادق، صادق لدرجة قال بده يبتدي بوضع دفتر الشروط، هيدا اللي ندى البستاني قالت انها سلمان أيها بعد ما حضرته خلال فترة انجازاتها، واللي اصلا المفروض انه حاضر من حوالي الـ١٠ سنين بما انه التيار المنزه عن الدنايا مستلم الوزارة من سنوات قولكم حتى دفتر شروط ما خلوهم يحطوا؟ بما انه هلقد صادق لازم نلحق حالنا ونسأله عن تاريخ استخراج النفط هيدا اللي فرق بين البستاني وتوتال ٩ سنين بس قبل ما يخبرنا الحاطوم انه ننسى المهم الوزير الجديد قال الكهربا ما رح تجي ٢٤/٢٤ لا بالمستقبل المنظور او المتوسط قولكم هو جاية يتفرج عليها معنا مقطوعة

ووزير الصحة الله يطمن قلبه متل ما طمن لنا قلبنا كورونا تحت السيطرة، كل اعتمادنا على دول الترانزستورات تكون اخدة احتياطاتها صح لان صحيح الصين بلشت تختبر دوا للكورونا بس نحن أدوية اتش وان ان وان مقطوعة عنا

ان شاء الله موت اذا عم كذب بس في عالم اعتبرت انه الكورونا مؤامرة بيولوجية اميركية ضد الصين لان السيد ناوي يفتح معها علاقات اقتصادية، هول الاشخاص ما انتبهوا انه الحزب وجه صفعات مدوية للاميركان هيدا الاسبوع

الأولى التظاهرات بالعراق اللي قسمت العواقيين وقيمت القيامة ضد مقتدى الصدر وخطه

والتانية بتشكيل الحكومة بلبنان هيدي اللي سيجت نفسها خوفا من رفض الشارع

اصلا انا تابعت الاعلام الاميركي وشفت الاميركان مصفوعين انتو مستقلين صفعتين على الراس... خليني ساكتة