خليني ساكتة

خليني ساكتة (٢٧) بالنسبة للانتخابات النيابية المبكرة شو؟ مسودة البيان الوزاري فيها كل شي وما فيها شي!

تم النشر في 3 فبراير 2020


١٧ صفحة ملعوبة

منمّقة مهفهفة نظيفة سلسة مفبركة

هيدي مسودة ممكن تتغير، تتعدل، تترستق، لنشوف رد الافرقاء السياسيين عليها

وخصوصا هول اللي اعتبره انه تسريب البيان غير بريء،


مسرب عن براءة او غير براءة مش مهم المهم انه المسودة فيها كل شي وما فيها شي

اهم شي انه ما فيها لا من قريب ولا من بعيد انتخابات نيابية مبكرة، علما انه هيدا اول وابرز مطلب عند الحراك، اللي مقدمة مسودة البيان الوزاري متدعية انها مراعيته ومراعية طلبناته وسامعة نبضه اللي بالشارع لا ومش بس هيك حيّت جرأته بالمطالبة بحقه.

١٧ صفحة عم بتصارحنا انه ببساطة ما حدا رح ينجى من "انهيار الاقتصاد ".. بس بلطافة

هي صحيح الخطوات اللي فايتين عليها مؤلمة بس لمصلحتنا، يعني يمكن هلق ما نفهم هيدا الشي بس مع الوقت رح نتذكر قديه كان مهم هيدا الشي

للمانة كل شي مذكور كل الكلمات الرنانة اللي منحب نحن اللبنانيين نسمعهم ونعديهم ونكررهم موجودين

العنف الاسري

الكوتا النسائية

منح المرأة الجنسية لاولادها

مكافحة الفساد

معطوف على استراتيجية وطنية

الوصول للمعلومات

وغيرها من العبارات اللي بتدغدغ المشاعر، هلق هي موجودة بس على قاعدة من فسر الماء بالماء، يعني البيان الوزاري عامل شغله، وبما انه العبرة بالتطبيق بس للتطبيق لا بد من فرصة الفرصة هي ٣ مراحل ١٠٠ يوم

سنة

٣ سنين

آآآه يعني ما في انتخابات نيابية مبكرة؟

لا ما في بس أخبرا وليس آخرا يعني قد يكون بالتوقيت هيدا آخر اسبوع من ال٣ سنين المطلوبين رح تناقش الوزارة قانون انتخابات هالمرة مش براعي الحراك بس ولكن بيعكس تلاقي اللبنانيين واللبنانيات بالساحات

بلا طول سيرة الحكومة الجديدة رح تنفّذ كل اللي قررته الحكومات السابقة

مع الالتزام بـ:

"سيدر" وشروطه

"ماكنزي" وتوصياتها

"الورقة الاصلاحية" لحكومة الحريري

الغاء الدعم ورفع سعر الكهرباء

الخصخصة

يعني كل شي ادى لاسقاط الحكومة السابقة وكل قرار وصل البلد عالخراب آه عالانهيار

الوضع الاقتصادي آخد حيز اساسي من البيان كما يجب بمرحلة متل هيدي واضح انه علاقة المصارف مع عملائها رايحة صوب المزيد من الضبابية لصالح المصارف اكيد

الليرة مارقين عليها مرور الكرام لانها بخير اصلا راجعوا تصريحات رياض سلامة ما بقى تعيدوا وتزيدوا

خلينا نعترف انه الحكومة الجديدة متفائلة، نحن بس المواطنين نحط ايدنا بإيدها والارجح نحتاج كلنا بطاقات الاكثر فقرا مش بس ٤٠٪ من الشعب

الامن الغذائي محفوظ يعني ما بقى نخاف من مواضيع متل انهم يقتلوننا بالدجاج، ومعليه اسمحوا لي قول شي كل وزير سابق للبيئة، الصحة، الزراعة وكل فريق سياسي استلم اي من هيدي الوزارات من ٢٠ سنة لهلق لما نقل لكم كلن يعني كلن ما يسمعني صوته

القضاء المستقل انطلاقة للبيان الوزاري هلق ما بعرف اذا استقلال القضاء بيشمل مثلا القضاء اللي حكم الاسبوع الماضي على مطعم من المطاعم بالضاحية

الدليل انه هيدي الحكومة ذات كيان مستقل، انها جابت وزيرة اعلام بالوقت للورقة الاصلاحية تبع الحكومة السابقة دعت لالغاء الوزراة.

استخدمت مفرداتها الخاصة، توجهت للبنانيين في بلاد الاغتراب ولم تعتبرهم منتشرين بل مغتربين طلبت منهم يساهموا بنهضة الاقتصاد... انا شخصيا ما بضمن لكم النتائج انتم اذا بتحبوا تستثمروا اصطفلوا يمكن اكتر شي نعمل لكم exception وما يلحقكن تعميمات المصارف الجديدة تحديد سقف السحوبات بالشهر بدل الاسبوع ممكن نبقى عم نعطيكم كل اسبوع، قال في موقع اخباري معنون بالأرقام- غوغل تفضح اللبنانيين الذين يفكّرون بالهجرة! انه لعب عالكلام للاشارة قديه في عدد لبنانيين عم يفكروا يهاجروا... يا حبيبي غوغل يفضح الحكومات المتعاقبة مش اللبنانيين لان اللبنانيين ببساطة هربانين من العز اللي عايشين فيه، انا شخصيا لو ما عندي طريق كل يوم بقطع من حد ثمثال المغترب اللبناني وبفكر ضوي شمعة تحت اجريه بلكي يصير يمثلني بس ما بعرف بعد مسودة البيان الوزاري يمكن لازم اعطي الحكومة فرصة

الجزء المتعلق بالعلاقات الخارجية ممتاز خاصة العلاقات بالدول الشقيقة والصديقة، ولك ان شاء الله موت اذا عم كذب بس اللي داعمينكم خللولنا صديق من الدول اللي بتحكي لغتنا او لغاتنا الثلاثة اللي شايفين حالنا فيها

HI KIFAK CA VA؟

مسودة بيان لا غبار عليها انشائيا، في خطأ او اثنين مطبعي بس مش قصة، كل شي موجود مبادرة السلام، قضية الامام موسى الصدر، المحكمة الدولية، حق المواطنات والمواطنين بالمقاومة، والجيش بمكافحة شبكات التجسس... كل شي موجود وصولا لانشاء اكاديمية الانسان للتلاقي والحوار... هيدي الاكاديمية بس يتم انشائها ببطل عنا حوادث مثلا متل ابن مسؤول تخانق مع حدا ع صفة سيارة بقوص بالعالي، والخلاف على مين بلش المشكل وكم رصاصة طلع من الفرد كمان بينتهي بالحوار والتلاقي

وبيبقى ابرز نقطة، نقطة النأي بالنفس عن السياسات التي تخل بعلاقاتنا مع الدول العربية... نأي بالنفس شو فهمنا؟

لازم نعطيها فرصة.... خليني ساكتة