العوض بسلامتك! خود نفس مع لارا (٧)

خود نفس مع لارا

تم النشر في 18 يونيو 2020

بحلقة اليوم من 180 درجة.. العوض بسلامتك

مرحبا، أنا لارا طوق سليمان 180 ثانية.. بلشنا

يعني بحياتك بتمرق بصف طويل وإيدك على صدرك اكتر بكتير من ما بتوقف ع تاني ميل من الصف، بس لما بتوقف ع تاني ميل من الصف بتنتبه انو الناس بتقطع بسرعة، وجع بيمشي عالبطيء وكل ما تحرك بيسلخ نص روحك معه وبتنتبه انو تلات رباع مصطلحات التعزية يلي منعوزون بينزلوا متل السكين بقلبك، شي مرة سألت حالك شو يعني العوض بسلامتك؟ أي عوض وأي سلامة اذا إنت بَيّ واقف بعزا ولد من ولادك، ليش انت اصلاً فيك تسلم ما من النهار يلي بيخلق ولدك عم تقلو تقبرني ومش عن عبث، عم تقلو تقبري تا ما توقف ع تاني ميل من الصف، مكسور، او تحمل تابوت يكسرك كل العمر، شي مرة سألت حالك شو يعني يقبالكن طولة العمر؟ ويلي ناقص بعمرن ينزاد بعمركن، بلحظة فيها انت ما بتعرف شو إلو قيمة يلي باقي من العمر.

في مصطلحات بتحمل تصحيح وفي لحظات جرحها اكبر بكتير من الحكي، في لحظات صمتك وحضورك بيحكوا اكتر من الحكي وفي لحظات الدني بتقلب فينا 180 درجة بلا ما تستأذن وبأصغر تفاصيلها والحياة بتقرر توقف بعكس توقعاتنا واحلامنا وصلواتنا ويلي بيبقى بيشوف الدني بعمق وحده الوجع بيعرفن، في ناس بتخلص قدام هيك وجع وفي ناس بتعيش خبرة خلص.. انت من اي ناس؟

الـ180 ثانية لليوم خلصوا بس الـ180 درجة هلق بلشوا.. نفس عميق، حِبّ الحياة.. لأنك قدا

لمتابعة لارا على قناتها على يوتيوب الضغط على الرابط

https://www.youtube.com/channel/UC3S_qRJVmseyz_0aKYwsbrQ